Roma Polo Club rebħu l-King of Spain Cup wara li għelbu lil Malta Polo Club tmienja għal seba’ punti u nofs.
Kienet logħba ferm sabiħa u inċerta sal-aħħar li paxxiet lil dawk preżenti fil-Malta Polo Club fejn raw l-aqwa plejers Maltin u dawk Taljani jilagħbu polo mill-aqwa.
Il-Maltin kellhom bdew bi tliet gowls vantaġġ iżda t-tim Taljan beda ġej bil-mod sakemm irnexxielu jdawwar l-iskor favurih.
Il-plejer Italo/Arġentin Patricio Rattagan spikka għal Roma Polo Club hekk kif skorja t-tmien gowls tat-tim tiegħu bil-Maltin li kellhom lil Karl Galea awtur ta’ tripletta u ż-żagħżugħ Bradlee Farrugia li kien awtur ta’ doppjetta. Il-captain Jeremy Besancon żied ieħor għall-Maltin.
L-Umpires għal din il-logħba kienu Mariano Itturioz u Gaston Etcheberry bit-tielet uffiċjal li kien Philip Wismayer.
Fi tmiem il-konfront l-ambaxxatur tal-Italja għal Malta Fabrizio Romano ippreżenta t-tazza lill-captain ta’ Roma Polo Club Patricio Rattagan fil-preżenza tal-president tal-Malta Polo Club Matthew Borg u tal-kap eżekuttiv ta’ EquestriMalta Max Zammit.
Din l-attivita’ saret bil-kollaborazzjoni ta’ EquestriMalta.
