Id-difensur ċentrali ta’ Barcelona Ronald Araujo huwa lest li jmur jilgħab fil-Premier League fost suġġerimenti li kemm Chelsea kif ukoll Liverpool huma ħerqana li jiffirmawh is-sena d-dieħla.
Iż-żagħżugħ ta’ 22 sena kien player importanti għall-ġganti Katalani matul l-istaġun 2021-22, fejn għamel 14-il dehra fil-kompetizzjonijiet kollha, iżda dan l-aħħar kien hemm spekulazzjoni dwar il-futur tiegħu.
Il-kuntratt ta’ Araujo fil-Camp Nou għandu jiskadi f’Ġunju 2023, u huwa maħsub li d-diskussjonijiet dwar ftehim ġdid potenzjali mal-Katalani mhumiex avvanzati.
Rapport riċenti sostna li kemm Chelsea kif ukoll Liverpool huma ħerqana għall-internazzjonali Urugwajan, li għamel 52 dehra fl-ewwel team ma’ Barcelona minn mindu ngħaqad magħhom mingħand Boston River fl-2017.
Araujo huwa ‘estremament grat’ lejn il-club attwali tiegħu iżda jinsab miftuħ għall-idea li s-sena d-dieħla jmur jilgħab fil-Premier League.
Barcelona huma maħsuba li huma lesti li joffru lill-player mill-Amerika t’Isfel kuntratt ġdid ta’ ħames snin iżda jistgħu jitħabtu biex jissodisfaw it-talbiet tiegħu dwar il-pagi fost il-problemi finanzjarji kontinwi tagħhom.
