Għal dawn l-aħħar sentejn, inizjattiva ta’ riċiklaġġ f’Izabal, fil-Gwatemala, kienet qed tagħmel differenza pożittiva fil-ħajja tan-nies u fl-ambjent, billi tibdel l-iskart f’opportunità għal futur aħjar.
Permezz ta’ din l-inizjattiva, mhux biss qed jiġi protett l-ambjent permezz tar-riċiklaġġ, iżda qed jingħata wkoll appoġġ lill-familji lokali u qed titqajjem kuxjenza fost il-ġenerazzjonijiet iż-żgħar dwar l-importanza tal-ħarsien tan-natura.
Dan il-proġett huwa r-riżultat ta’ ħidma kontinwa u ta’ ġenerożità straordinarja minn persuni u benefatturi minn diversi partijiet tad-dinja fosthom minn Malta u Għawdex, li emmnu f’din il-kawża u għenu biex din l-inizjattiva tkompli tikber.
F’messaġġ ta’ ringrazzjament, l-organizzaturi tal-proġett esprimew il-gratitudni tagħhom lejn il-benefatturi kollha, lejn dawk li jagħtu l-appoġġ tagħhom kuljum, u b’mod partikolari lejn il-missjunarju Għawdxi Dun Anton Grech, li kien ta’ gwida importanti f’dan il-proġett.
Huma talbu wkoll lil Alla jbierek lil dawk kollha li, b’xi mod jew ieħor, qed jagħtu sehemhom biex din il-ħidma tkompli tħalli frott.
Din l-inizjattiva turi kif, permezz tas-solidarjetà, il-ġenerożità u l-impenn favur l-ambjent, l-iskart jista’ jinbidel f’opportunità għal ħajja aħjar, b’aktar dinjità u tama għall-komunitajiet lokali.
