L-attakkant ta’ Barcelona, Sergio Aguero, ċaħad xnigħat li jista’ jiġi sfurzat jirtira kmieni minħabba l-problema ta’ qalbu.
Il-player ta’ 33 sena ġie eskluż mill-azzjoni għal mill-inqas tliet xhur wara li sofra minn uġigħ f’sidru waqt il-konfront tat-team tiegħu fil-La Liga kontra Alaves fl-aħħar ta’ Ottubru.
Rapport riċenti sostna li l-kundizzjoni ta’ Aguero kienet aktar serja milli l-ewwel kien jibża’, u jista’ jiġi sfurzat idendel iż-żarbun qabel iż-żmien minħabba tħassib dwar saħħtu fit-tul.
Madankollu, waqt li kiteb fuq il-media soċjali nhar il-Ġimgħa, l-internazzjonali Arġentin insista li l-pjan hu li għad-90 jum li ġejjin ma tittieħed ebda deċiżjoni finali wara li jsirulu testijiet u trattament.
“Minħabba l-għajdut, ngħidilhom li qed insegwi l-indikazzjonijiet tat-tobba tal-club, nagħmel testijiet u trattament u nara l-progress tiegħi fi żmien 90 jum. Dejjem inżomm ruħi pożittiv,” kiteb Aguero fuq Twitter.
Aguero għamel biss ħames dehriet għal Barcelona mill-wasla tiegħu, wara li kien sfurzat jitlef l-ewwel ġimgħat tal-istaġun 2021-22 minħabba problema fil-pexxul.