Fdawn it-tliet se ijiem tintlagħab il-11-il ġurnata tas-Serie A fejn il-leaders Napoli jkunu nvoluti f’partita delikata kontra Atalanta filwaqt li Inter, li jinsabu fit-tieni pożizzjoni, jilqgħu lil Venezia.
Napoli v Atalanta – Napoli jilqgħu lil Atalanta meta ż-żewġ timijiet ġejjin minn rebħa.
Il-Partenopei, immexxija mill-coach, Antonio Conte, qabdu ritmu konsistenti u r-rebħa li kisbu f’nofs din il-ġimgħa barra minn darhom kontra Milan, bl-iskor ta’ 2-0, tixhed dan kollu.
Iż-żewġ players letali tagħhom, Kvicha Kvaratshkelia u Romelu Lukaku, qed ikunu ferm importanti, tant, li s’issa diġá skorjaw disa’ goals bejniethom.
Min-naħa ta’ Atalanta, dawn jinsabu fit-tielet post tal-klassifika u għaldaqstant il-mira tagħhom hija li jikkwalifikaw għall-UEFA Champions League.
Matteo Retegui huma l-ispirazzjoni tal-Bergamaschi hekk kif huwa wkoll l- aqwa skorer u għaldaqstant, in-Naplitani jridu jagħrfu kif se jwaqqfu l-furja tiegħu.
Napoli ma jistgħux jagħmlu użu minn Stanislav Lobotka filwaqt li Marco Brescianini, Gianluca Scamacca u Giorgio Scalvini, huma neqsin għal Atalanta minħabba li kollha qed jirkupraw minn injury.
Inter v Venezia – Inter jibdew favoriti netti meta jilqgħu lil Venezia li jinsabu fil-qiegħ tal-klassifika.
Bħalissa, in-Nerazzurri jinsabu erba’ punti taħt Napoli u filwaqt li jittamaw li l-Partenopei jiżolqu kontra Atalanta, xejn għajr minn rebħa ma tissodisfa l-kriterji tagħhom jekk iridu jibqgħu jżommu l-pass man- Naplitani.
Inter għandhom lil Carlos Augusto, Francesco Acerbi u Hakan Calhanoglu, neqsin għax jinsabu mweġġgħin.
Udinese v Juventus – Dan huwa konfront bejn żewġ timijiet li fl-aħħar ħarġa ma rebħux. Filwaqt li Udinese tilfu 3-2 kontra Venezia, f’darhom Juventus ġew miżmuma fi draw ta’ 2-2 biex fallew żewġ punti mill-aktar importanti.
Huma għandhom lil Douglas Luiz, Nicolas Gonzalez, Bremer u Arkadiusz Milik imweġġgħin.
Monza v Milan – Dan huwa ċ-ċans għal Milan biex jirritornaw għar-rebħ hekk kif jinsabu fid-disa’ post u 11-il punt taħt il-leaders u lagħbu partita inqas.
Il-pressjoni qed tikber fuq il-coach, Paulo Fonseca, li jitkeċċa.
Huma għandhom lil Luka Jovic, Matteo Gabbia, Ismael Bennacer u Alessandro Florenzi neqsin.
