Stephanie Frappart se tikkontrolla l-partita ta’ ħbiberija internazzjonali tal-Ġimgħa bejn l-Ingilterra u l-Awstralja, u b’hekk se ssir l-ewwel uffiċjal mara li tissorvelja partita internazzjonali tal-irġiel f’Wembley Stadium.
Il-Franċiża Frappart saret l- ewwel mara li kkontrollat partita tat-Tazza tad-Dinja tal-irġiel fil-Qatar 2022 meta ġiet inkarigata mir-rebħa tal-Ġermanja fuq il-Costa Rica li tal-ewwel rebħu 4-2.
Peter Elsworth, il-kap tal-operazzjonijiet tar-refereeing tal-FA, qal: “Stephanie hija referee mill-aqwa.
“Aħna kuntenti li hi u t-team tagħha se jieħdu ħsieb il-partita li jmiss tagħna kontra l-Awstralja quddiem folla mibjugħa f’Wembley Stadium u aħna ħerqana li nilqgħuhom fid-dar tal-football Ingliż.”
Ma’ Frappart se jingħaqdu l-assistenti referees, Mikael Berchebru u Aurelien Drouet u r-raba’ uffiċjal se jkun Hakim Ben El Hadj, bil-VAR ikun Mathieu Vernice u l-Assistent VAR, Nicolas Rainville jikkomplimentaw il-grupp ta’ uffiċjali kollha Franċiżi.
L-uffiċjal ta’ 39 sena kienet pijuniera għar-referees nisa, meta ħadet it-tmexxija tal-partiti ta’ Ligue 2 u Ligue 1 tal-irġiel fi Franza, kif ukoll kienet l-ewwel mara li rreffjat fiċ-Champions League u fil-UEFA Super Cup.
