It-tennista Ukrena Elina Svitolina ħabbret li se ttemm iż-żwieġ tagħha mat-tennista Franċiż Gael Monfils wara ħames snin miżżewġin.
Svitolina, li bħalissa tinsab fis-sitt post tar-rankings mondjali, spjegat li l-gwerra Russa kontra l-Ukrajna ħalliet impatt emozzjonali qawwi fuqha, b’iljieli bla rqad u dubji li wassluha biex tħoss li kienet qed titlef lilha nnifisha.
Svitolina qalet li waslet għall-konklużjoni li kellha bżonn terġa’ ssib lilha nnifisha, u li ma setgħetx tagħmel dan fiż-żwieġ tagħha. Hija rringrazzjat lil Monfils għall-appoġġ u r-rispett tiegħu, filwaqt li saħqet li ħadd minnhom m’għandu t-tort.
Il-koppja żżewġet fl-2021 u għandha tifla ta’ erba’ snin, Skai, li se tibqa’ l-prijorità tagħhom. Minkejja t-tmiem taż-żwieġ, it-tnejn se jibqgħu jaqsmu r-responsabbiltà tat-trobbija tagħha.
