Ħafna ġenituri jammettu li fost wieħed mill-mumenti speċjali għalihom huwa meta t-tifel jew it-tifla tagħhom jagħmlu l-ewwel passi. Għall-koppja mill-Ingilterra dan il-mument kien wieħed emozzjonali aktar mis-soltu.
Dan hekk kif raw lil binthom Posie-Aurora Sadler-Smith, li għandha sena, tagħmel l-ewwel passi tagħha bir-riġlejn prostetiċi ġodda wara li kellha tagħmel amputazzjoni.
Iċ-ċkejkna ġiet dijanjostikata b’diżordi rari ħafna li tissejjaħ ‘fibular hemimelia’ li tista’ taffettwa persuna minn kull 50,000.
Din it-tip ta’ diżabilità ġeneralment taffettwa sieq waħda biss, iżda Posie twieldet bi kważi l-għadam kollu f’saqajha nieqsa hekk kif twieldet mingħajr irkoppa tal-lemin u l-għadam ta’ taħtha, u mingħajr l-għaksa tax-xellug.
Madanakollu, iċ-ċkejkna ma qatgħetx qalbha hekk kif tgħallmet titkaxkar u kif tuża’ s-saħħa kollha tal-parti ta’ fuq ta’ ġisimha biex tiċċaqlaq.
Il-ġenituri tagħha kellhom deċiżjoni diffiċli jekk jamputawx saqajha biex jagħtuha ċans li timxi fuqhom.
Ftit wara li għalqet sena, saqajha x-xellugija ġiet amputata mill-parti tal-għaksa u aktar tard għamlulha riġlejn prostetiċi bil-lewn favorit tagħha li huwa r-roża.
Il-ġenituri tagħha emozzjonaw ruħhom wara li aktar tard mal-ġurnata, hija pruvat tagħmel l-ewwel passi tagħha bl-għajnuna ta’ missierha.
Ommha qalet li l-prostetiċi jieħdu ħafna ħin biex jindraw, imma amettiet li kienet xi ħaġa sabiħa ferm li tara lit-tifla tagħhom tqum fuq saqajha għall-ewwel darba minkejja li għalissa ma tistax tagħmel hekk mingħajr l-għajnuna ta’ xi ħadd.
