Bojan Veljanoski ta’ 24 sena u Daniel Mackinovski ta’ 25 sena – it-tnejn mill-Maċedonja u Ivan Georgiev Ivanov ta’ 19-il sena tressqu l-Ħadd filgħodu quddiem il-Maġistrat Claire Stafrace Zammit.
It-tliet żgħażagħ, li kienu arrestati l-Ġimgħa waranofsinhar, wieġbu mhux ħatja għall-akkużi miġjuba kontrihom fosthom dwar assoċjazzjoni bi skop li tiġi importata d-droga kannabis f’pajjiżna u li kienu fil-pussess tad-droga li nstabet f’ċirkostanzi li juru li ma kinitx għall-użu esklussiv tagħhom. Ivanov waħdu kien mixli li kellu fil-pussess tiegħu d-droga kokaina.
Il-Prosekuzzjoni spjegat fil-Qorti kif kien ġie identifikat pakkett, indirizzat lil wieħed mill-imputati, li kien ġej minn barra minn Malta, b’żewġ kilogrammi droga suspettata kannabis b’valur fis-suq li jaqbeż il-€15,000.
Ingħad li l-Pulizija kienet għamlet ukoll tfittxija f’residenza f’Wied il-Għajn u flimkien mal-pakkett instabu wkoll xi qratas b’sustanza kokaina flimkien ma’ mwieżen u numru ta’ mobiles.
Fil-Qorti saret talba għall-ħelsien mill-arrest tal-imputati, bl-Avukati li qed jidhru għal Veljanoski u Mackinovski jargumentaw li l-klijenti tagħhom kellhom indirizz fiss u kienu lesti li jħallsu d-depożitu għal-libertà proviżorja.
L-Avukat ta’ Ivanov qal li l-klijent tiegħu ilu jgħix Malta għal dawn l-aħħar għaxar snin, għandu indirizz fiss, li għadu qed jistudja u li għandu fedina penali netta. Barra minn hekk, Ivanov kien qed jallega li safa msawwat u sfurzat jaġixxi kontra r-rieda tiegħu miż-żewġ ko-akkużati l-oħra.
Wara li semgħet is-sottomissjonijiet taż-żewġ naħat, il-Qorti ċaħdet it-talba għall-ħelsien mill-arrest. B’hekk, it-tliet żgħażagħ baqgħu jinżammu taħt arrest preventiv fil-Faċilità Korrettiva ta’ Kordin.
Il-Qorti laqgħet it-talba tal-prosekuzzjoni u nħarġet ordni ta’ ffriżar fuq l-assi tal-imputati.
Il-Prosekuzzjoni tmexxiet mill-Avukat Maria Francesca Spiteri mill-Uffiċċju tal-Avukat Ġenerali flimkien mal-Ispettur Jonathan Pace.
L-Avukati Franco Debono u Adreana Zammit dehru għal Veljanoski u Mackinovski mentri l-Avukat Albert Zerafa assista lil Ivanov.
