Todd Boehly jidher li jinsab qrib li jtemm l-involviment tiegħu ma’ Chelsea wara li allegatament aċċetta li jbiegħ is-sehem tiegħu lil Clearlake Capital.
Boehly, flimkien ma’ Mark Walter u Hansjorg Wyss, għandhom 38.5% tal-club, filwaqt li Clearlake għandhom 61.5%. Jekk il-ftehim jiġi finalizzat, Clearlake se jżidu is-sehem tagħhom għal 99.9%, u b’hekk Behdad Eghbali u Jose E. Feliciano jiksbu kważi kontroll sħiħ tal-club.
Il-konsorzju mmexxi minn Boehly xtara lil Chelsea għal £2.5 biljun fl-2022, wara t-tluq ta’ Roman Abramovich, u wiegħed ukoll investiment addizzjonali ta’ £1.75 biljuni.
Inizjalment Boehly kellu rwol importanti fit-tmexxija tal-club, iżda aktar tard naqqas l-involviment tiegħu fl-operat ta’ kuljum hekk kif Eghbali sar aktar influwenti.
It-tensjonijiet bejn Boehly u Eghbali bdew jidhru fl-2024. Ir-restrizzjonijiet fuq il-bejgħ tal-ishma kienu jfissru li kwalunkwe bidla kellha ssir fi ħdan il-konsorzju.
Ix-xewqa ta’ Walter li jitlaq allegatament għenet biex jissolva l-impass.
Minkejja dan, Boehly għadu jattendi l-logħbiet ta’ Chelsea u jibqa’ involut ħafna fl-isport, fosthom permezz ta’ Los Angeles Dodgers u Los Angeles Sparks.
