UCL: Fadal ħames timijiet biex jikkwalifikaw għall-Aħħar 16

Illum u għada jintlagħbu ż-żewġ programmi tas-sitta u l-aħħar ġurnata tal-Fażi tal-Gruppi tal-UEFA Champions League hekk kif fadal ħames timijiet oħra għal kwadru komplet biex isiru magħrufa l-aħħar 16-il team liema round jintlagħab fuq żewġ legs fuq bażi eliminatorja.  

S’issa kkwalifikaw 11-il team … f’din l-ordni:

Grupp A: Manchester City u Paris St-Germain 

Grupp B: Liverpool

Grupp C: Ajax u Sporting Lisbon

Grupp D: Real Madrid u Inter

Grupp E: Bayern Munich

Grupp F: Manchester Uni­ted

Grupp H: Chelsea u Juventus

Jekk wieħed jinnota sew, Grupp G huwa l-aktar wie­ħed bilanċjat minħabba li s’issa għadu ma kkwalifika l-ebda team. 

L-erba’ timijiet għandhom ċans li jgħaddu hekk kif Salzburg jilqgħu lil Sevilla filwaqt li Lille jmorru jilagħbu għand Wolfsburg. 

Jekk Wolfsburg joħorġu rebbieħa jkunu huma li jgħaddu minħabba l-konfront dirett. F’każ li Salzburg u Sevilla jtemmu fi draw, jkunu Salzburg li jikkwalifikaw minkejja li jispiċċaw bi tmien punti daqs Lille u Wolsburg min­ħabba li l-konfronti diretti kontra Lille huma aħjar. 

Jekk imbagħad Sevilla jegħlbu lil Salzburg ikunu l-Ispanjoli li jaqtgħu l-passaġġ tagħhom. 

Is-sitwazzjoni ta’ Grupp B hija ferm interessanti hekk kif Milan jilagħbu f’darhom kontra Liverpool filwaqt li Porto jilqgħu lil Atletico Madrid. 

B’Liverpool diġá rebbieħa tal-grupp, iċ-ċans ta’ Milan li jgħaddu huwa biss jekk jegħlbu lir-Reds filwaqt li Porto u Atletico jis­piċċaw fi draw. 

Jekk Milan ma jirbħux u Porto u Atletico jtemmu fi draw jkunu l-Portugiżi li jgħaddu. Min-naħa tagħhom, Atletico jridu jirbħu biex jikkwalifikaw. 

Fi Grupp E, b’Bayern Munich diġá kwalifikati, it-taqtiegħa hija bejn Barcelona u Benfica. Il-Katalani jridu jaċċertaw rebħa għand Bayern biex jgħaddu. F’każ ta’ draw u Benfica jegħlbu f’darhom lil Dinamo Kiev, ikunu l-Protugiżi li jibqgħu għaddejjin minħabba l- konfronti diretti … dejjem jekk Benfica jirbħu. 

Fi Grupp F, b’Manchester United diġá kwalifikati, l-isfida hija bejn Villarreal u Atalanta, b’dawn tal-aħħar jilagħbu f’darhom, fejn xejn għajr minn rebħa ma tarahom jingħaqdu mal-15-il team l-ieħor.