Meta bdiet tintlagħab it-tielet ġurnata tal-Fażi tal-Gruppi tal-UEFA Champions League, Manchester United reġgħu daħlu biċ-ċans li jkomplu javvanzaw f’din il-kompetizzjoni b’rebħa importanti ta’ 1-0 fuq FC Copenhagen.
Grupp A
Man Utd v Copenhagen – Minkejja li ma kienux fl-aqwa forma tagħhom, Manchester United irreġistraw rebħa ta’ 1-0 fuq FC Copenhagen.
Fl-ewwel 10 minuti, id-Daniżi kienu sfortunati li ma fetħux l-iskor meta Diogo Goncalves ġie mċaħħad mil-lasta.
Peró Harry Maguire (72) spiċċa l-eroj meta skorja l-uniku goal tal-partita.
Qabel dan il-konfront saret tislima emozzjonanti għall-memorja tal-leġġendarju, Bobby Charlton, li miet nhar il-Ħadd li għadda fl-etá ta’ 86 sena.
Galatasaray v Bayern M. – Bayern Munich marru t-Turkija u għelbu lil Galatasaray bl-iskor ta’ 3-1 biex irreġistraw it-tielet rebħa minn daqstant partiti u għalaqstant għandhom sieq waħda fir-round tal-Aħħar 16.
It-tliet goals tal-Bavarjani waslu minn Kingsley Coman (8), Harry Kane (73) u Jamal Musiala (79) filwaqt li Mauro Icardi (30) kiseb id-draw momentarju minn penalty għal Galatasaray.
Grupp B
Sevilla v Arsenal – Arsenal irritornaw għar-rebħ meta barra minn darhom għelbu lil Sevilla 2-1.
Huma fetħu l-iskor fir-raba’ minuta tal-ħin miżjud tal-ewwel taqsima meta minn kontrattakk, Gabriel Martinelli dar mal-goalkeeper avversarju qabel ma xeħet fix-xibka … bit-tieni wieħed jasal minn Gabriel Jesus (53). Iżda Nemanja Gudelj (58) naqqas il-marġni għall-Ispanjoli.
Lens v PSV – Lens u PSV Eindhoven temmew fi draw ta’ 1-1. Johan Bakayoko (54) fetaħ l-iskor għal PSV iżda Sepe Elye Wahi (65) kiseb id-draw għall-Franċiżi.
Grupp C
Un. Berlin v Napoli – Napoli marru l-Ġermanja u għelbu lil Union Berlin bl-iskor ta’ 1-0, bil-goal importanti jasal minn Giacomo Raspadori (65).
Braga v Real Madrid – Barra minn darhom Real Madrid għelbu lil Braga 2-1, bl-iskorers ikunu Rodrygo (16) u Jude Bellingham (61) filwaqt li Alvaro Djalo (63) wieġeb għall-Portugiżi.
Grupp D
Inter v Salzburg – Inter kellhom jitħabtu biex għelbu lil Salzburg bl-iskor ta’ 2-1.
Kien Alexis Sanchez (19) li fetaħ l-iskor għan-Nerazzuri iżda Oscar Gloukh (57) kiseb id-draw għall- Awstrijaki f’azzjoni li fiha ħadu sehem sitt players.
Madankollu Hakan Calhanoglu (64) ta tliet punti prezzjużi lil Inter mill-11-il metru wara foul fuq Davide Frattesi fil-kaxxa.
Benfica v Sociedad – Real Sociedad ħasdu lil Benfica billi rebħulhom bl-iskor ta’ 1-0 biex il-Portugiżi għadhom mingħajr l-ebda punt u huma prattikament eliminati.
Il-goal wasal minn Brais Mendez (63).
