Illum u għada jintlagħab l-ewwel leg tal-play-offs biex jiġi magħruf it-tieni sett ta’ tmien timijiet biex jikkwalifikaw għall-Aħħar 16 tal-UEFA Champions League.
Dawn jingħaqdu ma’ dawn it-timijiet li fil-Fażi tal-Kampjonat spiċċaw fl-ewwel tmien postijiet. Dawn huma Liverpool, Barcelona, Arsenal, Inter, Atletico Madrid, Bayer Leverkusen, Lille u Aston Villa.
Dawk it-timijiet li spiċċaw bejn id-disa’ u s-16-il post ġew seeded u għaldaqstant se jilagħbu l-ewwel leg barra minn darhom.
Bla dubju, l-aktar konfront li se jiġbed attenzjoni huwa dak bejn Manchester City u Real Madrid. Hija ħasra li team minnhom se jkollu jċedi postu f’dan l-istadju hekk bikri.
Man City v Real Madrid – Manchester City jilqgħu liċ-champions renjanti, Real Madrid, li fil-veritá ż-żewġ timijiet iddiżappuntaw bil-kbir fir-round preċedenti hekk kif is-City spiċċaw fit-22 post filwaqt li l-Madrileni temmew fit-12-il pożizzjoni.
Dan huwa konfront miftuħ għal kull riżultat u ma tkun l-ebda sorpriża li t-tieni leg jiġi deċiż bil-penalties.
Peró, filwaqt li l-Ispanjoli ma kienux attivi fis-suq tat-trasferimenti, is-City saħħew l-iskwadra b’għadd ta’ akkwisti ġodda – Omar Marmoush (Eintracht Frankfurt); Nico Gonzalez (Porto); Abdukodir Khusanov (Lens) u Vitor Reis (Palmieras).
Iż-żewġ timijiet se jkollhom jgħaddu mingħajr bosta players minħabba li qed jirkupraw minn injury – il-goalkeeper Ederson, Rodri, Nathan Ake, Jeremy Doku u Oscar Bobb għal Manchester City u Antonio Rudiger, David Alaba, Eduardo Camavinga, Dani Carvajal u Eder Militao għal Real Madrid.
Juventus v PSV Eindhoven – Juventus jilqgħu lil PSV Eindhoven li ġejjin minn rebħa ta’ 3-2 fuq Liverpool biex din kienet l-unika darba li t-team Ingliż waqqa’ l-punti fil-Fażi tal-Kamp- jonat.
Il-Bianconeri spiċċaw fl-20 post filwaqt li l-Olandiżi temmew fit-13-il post.
Din se tkun ripetizzjoni tal-ewwel partita tal-Fażi tal-Kampjonat meta f’darhom il-Juventini kienu ħarġu rebbieħa bl-iskor ta’ 3-1.
F’Jannar li għadda huma saħħew l-iskwadra tagħhom b’erba’ akkwisti – Lloyd Kelly (Newcastle United), Renato Veiga (Chelsea) u Randal Kolo Muani (Paris SG) kollha b’self u lil Alberto Costa (Guimaraes) b’kuntratt permanenti.
Feyenoord v Milan – Dan huwa konfront ieħor bejn timijiet Olandiżi u Taljani, b’Milan jibdew favoriti li jaqtgħu l-passaġġ tagħhom fl-Aħħar 16.
Filwaqt li r-Rossoneri spiċċaw fit-13-il post, Feyenoord spiċċaw sitt pożizzjoni ‘l isfel.
Anke Milan saħħew l-iskwadra tagħhom meta ffirmaw xejn inqas minn ħames players – Kyle Walker (Manchester City), Santiago Jimenez (Feyenoord), Warren Bondo (Monza), Joao Felix (Chelsea) u Riccardo Sottil (Fiorentina).
Celtic v Bayern M. – Celtic għandhom ostaklu mill-aktar diffiċli meta jospitaw lill- ġganti Ġermaniżi, Bayern Munich li spiċċaw fil-11-il post.
It-team immexxi mill-manager, Brendan Rodgers, irid jagħraf kif se jwaqqaf lill-attakkant internazzjonali Ingliż, Harry Kane, li bħal donnu ma jistax jieqaf jiskorja.
Brest v Paris SG – Dan huwa derby Franċiż bejn żewġ timijiet li ftit tal-jiem ilu ltaqgħu f’Ligue 1 fejn Paris St-Germain għelbu lil Brest bl-iskor ta’ 5-2.
F’dik il-partita, Ousmane Dembele kien fi klassi għalih meta skorja tripletta filwaqt li Goncalo Ramos irreġistra doppjetta.
Peró, il-Pariġini ċedew bosta players matul ix-xahar ta’ Jannar wara li akkwistaw lill-winger Ġorġjan Khvicha Kvaratskhelia mingħand Napoli.
Fost dawn hemm Randal Kolo-Muani (Juventus), Xavi Simons (Leipzig), Cher Ndour (Fiorentina), Juan Bernat (Villarreal), Marco Asensio (Aston Villa) u Milan Skriniar (Fenerbahce).
Club Brugge v Atalanta – Żewġ timijiet li pproduċew football interessanti fil-Fażi tal-Kampjonat se jiltaqgħu f’partita li kapaċi tkun waħda interessanti.
Atalanta, li jinsabu fit-taqtiegħa għat-titlu tas-Serie A, spiċċaw fid-disa post bi 15-il punt fir-round preċedenti ta’ din il-kompetizzjoni.
Min-naħa l-oħra, Club Brugge spiċċaw fl-24 post meta wieħed ftit li xejn tahom iċ-ċans li jkomplu javvanzaw f’din il-kompetizzjoni.
Peró, Atalanta huma ostaklu diffiċli għalkemm jistgħu jiġu superati.
