L-Irlanda ta’ Fuq kisbet rebħa drammatika ta’ 1-0 kontra l-Georgia, fi Tbilisi, fil-bidu tar-ritorn tagħha fin-Nations League B. Shea Charles skorja l-goal deċiżiv fit-98 minuta, wara li l-partita dehret li kienet se tispiċċa mingħajr goals.
Wieħed mill-eroj ewlenin tal-Irlanda ta’ Fuq kien Pierce Charles, ħu Shea, li kellu prestazzjoni eċċellenti bejn il-lasti. Fit-tieni taqsima, fil-65 minuta, huwa salva penalty ta’ Khvicha Kvaratskhelia, wara deċiżjoni tal-VAR li Daniel Ballard kien għamel foul fil-kaxxa. Charles għamel ukoll diversi saves importanti fuq Georges Mikautadze u Otar Kiteishvili.
L-ewwel taqsima kienet relattivament kwieta, bl-Irlanda ta’ Fuq tkun kemxejn aħjar, iżda Georgia żiedet il-pressjoni wara l-mistrieħ. Mamardashvili salva tentattiv perikoluż ta’ Shea Charles, iżda fl-aħħar il-midfielder ta’ Fulham irnexxielu jsib ix-xibka u jagħti lit-team tiegħu tliet punti importanti.
Din kienet l-ewwel rebħa tal-Irlanda ta’ Fuq f’dan il-livell tan-Nations League u wkoll l-ewwel clean sheet f’logħba kompetittiva minn Ottubru 2024.
It-team issa jmissu jilgħab kontra l-Ungerija f’Belfast nhar it-Tnejn.
