Meta ntlagħbet is-seba’ ġurnata tal-Fażi tal- Kampjonat tal-UEFA Europa League, Lazio kkwalifikaw b’mod awtomatiku għall-Aħħar 16 fejn jonqoshom ukoll punt wieħed biex jirbħu din il-fażi.
Lazio v Real Sociedad – F’darhom Lazio ma sabu l-ebda diffikultá biex għelbu lil Real Sociedad bl-iskor ta’ 3-1, b’dawn tal-aħħar jilagħbu għal siegħa sħiħa bi player inqas wara li tkeċċielhom Aihen Munoz (30) għal żewġ karti sofor.
L-iskorers ta’ Lazio kienu Mario Gila (5), Mattia Zaccagni (32) u Valentin Castellanos (34).
Ander Barrenetxea (83) kiseb il-goal ta’ konsolazzjoni għall-Ispanjoli.
Alkmaar v Roma – Roma marru l-Olanda u sfaw megħluba bl-iskor ta’ 1-0 u issa jinsabu f’pożizzjoni li jistgħu jiġu eliminati.
Fl-aħħar partita, kontra Eintracht Frankfurt, xejn għajr minn rebħa ma tissodisfa l-kriterji tagħhom.
B’din ir-rebħa, Alkmaar qabżu lill-istess Roma fil-klassifika, bil-goal importanti jasal fit-80 minuta minn Troy Parrott.
Hoffenheim v Tottenham – Minkejja l-forma ħażina li għaddejjin minnha fil-Premier League Ingliż, Tottenham Hotspur barra minn darhom għelbu lil Hoffenheim bl-iskor ta’ 3-2.
Il-goals tagħhom ġew skorjati minn James Maddison (3) u minn doppjetta ta’ Son Heung-Min (22, 77).
Il-goals tal-Ġermaniżi waslu minn Anton Stach (68) u David Mokwa (88).
Fenerbache v Lyon – It-team Tork immexxi mill-coach, José Mourinho, Fenerbahce reġa’ ddiżappunta meta seta’ jispiċċa biss fi draw ta’ mingħajr goals kontra Lyon.
Filwaqt li dawn tal-aħħar jinsabu f’pożizzjoni tajba li jikkwalifikaw, Fenerbahce jistgħu jiġu eliminati.
Porto v Olympiakos – Porto komplew jiddiżappuntaw meta f’darhom tilfu kontra Olympiakos bl-iskor ta’ 1-0 biex jinsabu f’xifer l-eliminazzjoni.
L-uniku goal tal-partita wasal minn Ayoub El Kaabi (79).
Man Utd v Rangers – Manchester United telgħu fir-raba’ post tal-klassifika meta għelbu lil Rangers bl-iskor ta’ 2-1. Il-goals waslu minn auto-goal tal-goalkeeper, Jack Butland (52), u Bruno Fernandes (91) filwaqt li Cyriel Dessers (88) kiseb id-draw momentarju għat-team minn Glasgow.