Madwar 150 uffiċjal tal-pulizija komunitarja qed jiċċelebraw il-gradwazzjoni tagħhom minn kors maħsub biex jgħinhom jirrispondu b’mod aktar effettiv għall-abbuż online u kif jappoġġjaw lit-tfal biex jinnavigaw id-dinja diġitali b’mod sigur.
L-uffiċjali rċevew ċertifikazzjoni jew Award f’Child-Friendly Community Policing in Today’s Online World, kors ta’ livell 4 tal-MQF, waqt ċerimonja fejn attendew il-Ministru għall-Intern u s-Sigurtà Glenn Bedingfield u l-Kummissarju tal-Pulizija Angelo Gafà.
Il-kors akkreditat ġie mogħti taħt POP-Up, proġett li huwa parti mill-Malta Foundation for the Wellbeing of Society, li hija liċenzjata bħala Further and Higher Education Institution mill-Malta Further and Higher Education Authority (MFHEA).
Il-kap tal-MFWS Marie-Louise Coleiro Preca qalet li ċ-ċerimonja tal-gradwazzjoni ċċelebrat id-dedikazzjoni tal-uffiċjali u tirrifletti l-impenn tal-Fondazzjoni li tpoġġi l-wellbeing, is-sigurtà u d-drittijiet tat-tfal fil-qalba tal-pulizija.
“F’dinja dejjem aktar diġitali, l-uffiċjali tal-pulizija għandhom rwol vitali fil-protezzjoni u l-appoġġ tat-tfal u l-familji. Permezz ta’ dan it-taħriġ, qawwu l-abbiltà tagħhom li jirrispondu b’professjonalità, empatija u fehim għall-isfidi li jiffaċċjaw iż-żgħażagħ online.
“Nirringrazzja lill-gradwati kollha u nirringrazzja lill-Kummissarju tal-Pulizija u lill-Forza tal-Pulizija ta’ Malta għall-kollaborazzjoni tagħhom. Flimkien, qed nibnu komunitajiet aktar sikuri u soċjetà aktar ċentrata fuq it-tfal,” qalet is-Sinjura Coleiro Preca.
II-Ministru Bedingfield spejga kif dan il-kors huwa importanti għax jagħti lill-uffiċjali l-għodod u l-għarfien meħtieġa biex jifhmu aħjar ir-realtajiet li qed jiffaċċjaw it-tfal illum, inklużi r-riskji fid-dinja online.
‘B’148 uffiċjal li temmew dan it-taħriġ, qed insaħħu l-kapaċità tal-Korp biex jipprevjeni r-riskji, jagħraf il-vulnerabbiltà u, fuq kollox, jibni ambjent fejn it-tfal iħossuhom sikuri biex jitkellmu u jfittxu l-għajnuna,” qal il-Ministru.
“Meta ninvestu fil-ħiliet tal-uffiċjali tagħna, inkunu qed ninvestu direttament fis-sigurtà tal-komunitajiet tagħna u fil-futur ta’ pajjiżna.”
Il-koordinatriċi tal-proġett POP-Up Antonella Gatt qalet li wara li temmew il-kors, l-uffiċjali issa kienu aħjar mgħammra biex jimmaniġġjaw rapporti li jinvolvu riskji online, jippromwovu użu aktar sigur tal-internet, jikkomunikaw is-sigurtà diġitali lit-tfal, u jifhmu aħjar il-pajsaġġ diġitali li qed jinbidel b’mod mgħaġġel.
Il-ħiliet koperti huma wkoll kruċjali biex jinbena fiduċja mat-tfal. L-uffiċjali ġew imħarrġa biex jidentifikaw imġieba riskjuża online, jirrispondu b’empatija, u jintervistaw lit-tfal b’mod faċli għat-tfal, filwaqt li jadottaw approċċ preventiv u jużaw l-għodod miksuba biex jippromwovu prattiċi diġitali aktar sikuri fl-iskejjel u l-komunitajiet li jżuru.
Il-Kummissarju tal-Pulizija qal li s-sħubija mal-Malta Foundation for the Wellbeing of Society u l-Proġett POP-Up tagħha pprovdew lill-uffiċjali tal-komunità t-taħriġ xieraq biex jikkomunikaw mat-tfal b’sensittività, jagħrfu sinjali ta’ vulnerabbiltà u jintervjenu qabel ma l-ħsara teskala.
“Il-ħarsien tat-tfal illum jitlob li nifhmu kemm id-dinja fiżika tagħhom kif ukoll dik virtwali. Il-fiduċja li tinbena permezz tal-kuntatt ta’ kuljum fl-iskejjel u fil-komunitajiet tista’ tiddetermina jekk tifel jew tifla jħossuhomx komdi li jitkellmu meta jkun hemm xi ħaġa ħażina.
“Din l-inizjattiva ssaħħaħ l-impenn komuni tagħna favur servizz ta’ pulizija ċċentrat fuq it-tfal u tirrifletti l-konvinzjoni tagħna li s-salvagwardja tagħhom tiddependi mill-prevenzjoni, mill-intervent bikri u minn sħubija effettiva. ” qal is-Sur Gafà.
Ir-rappreżentanta tal-istudenti PS Abigail Sciberras, li kisbet l-ogħla punteġġi matul il-kors, qalet li t-taħriġ saħħaħ il-fehim tagħha dwar kif tikkomunika mat-tfal u ż-żgħażagħ fid-dinja diġitali ta’ llum.
“Dan il-kors għenni niffoka fuq is-smigħ attiv, l-empatija, is-sigurtà online u l-bini ta’ fiduċja. L-għarfien miksub se jappoġġja d-dmirijiet tiegħi fil-prevenzjoni u l-involviment tal-komunità, u se jgħin lit-tfal iħossuhom siguri u kunfidenti biex jersqu lejn il-pulizija.”
Aktar informazzjoni dwar il-korsijiet hija disponibbli fuq https://mfws.org.mt/courses/