Malta …………..0
Slovakkja ……3
It-tim nazzjonali Malti ta’ Taħt id-19-il sena ġie megħlub bl-iskor ta’ 3-0 mis-Slovakkja, minkejja tieni taqsima sodisfaċenti li fiha t-tim kien ferm viċin li jnaqqas il-marġni tal-iskor. Is-Slovakki ħolqu żewġ opportunitajiet ta’ gowls kmieni fil-logħba permezz tal-attakkant ċentrali Zoran Zahradnik. L-ewwel wieħed wasal wara biss żewġ minuti logħob, b’Luca Camilleri jsalva l-ewwel tentattiv tiegħu filwaqt li l-attakkant ċentrali mir-rebound tefa’ barra.
Fis-16-il minuta, l-istess Zahradnik xeħet barra minn angolu ideali b’Camilleri biss biex jegħleb. Erba’ minuti wara, Tadeas Hajovksy laqat il-wieqfa b’xutt minn tarf il-kaxxa. Malta b’xi mod żammet lura l-attakki Slovakki kontinwi fil-fażi inizjali. Madankollu, fis-36 minuta, Milan Rehus li jilgħab ma’ Hoffenheim kissru fetaħ l-iskor għat-tim tiegħu wara li rċieva minn assist mill-isbaħ ta’ Zahradnik, u għeleb lil Camilleri b’xutt preċiż fil-baxx. Mumenti wara, Camilleri imblokka tentattiv mill-viċin ta’ Michael Svoboda, li jilgħab ma’ Bologna fl-Italja, wara assist intelliġenti ta’ Rehus.
L-aħjar opportunità ta’ Malta fl-ewwel taqsima waslet fit-42 minuta b’Zak Barbara jsib lil Kian Vella fuq il-linja xellugija, li t-tentattiv tiegħu minn tarf il-kaxxa ġie mdawwar f’corner minn Jakub Bladzgon.
L-akbar ċans għal Malta wasal fis-77 minuta bil-goalkeeper Slovakk jonqos milli jżomm xutt potenti ta’ Lucas Caruana, b’Isaiah Chukunyere jservi lil Barbara li inkredibbilment falla mill-viċin. Dan wera li kien il-punt ta’ svolta fil-partita hekk kif fit-80 minuta, is-Slovakki rduppjaw l-iskor permezz tas-sostitut Alexej Maros, li mill-viċin ikkonkluda pass ta’ Jakub Murko, wara li temm azzjoni tajba fuq fuq il-lemin.
Fl-attakk li segwa, Zahradnik għeleb lil Camilleri għat-tielet darba b’gowl simili għat-tieni wieħed. Malta issa trid tegħleb lill-Kosovo b’numru tajjeb ta’ gowls filwaqt li l-Ukrajna għandha titlef kontra s-Slovakkja sabiex Malta taqbeż lill-Ukreni fil-goal-average u tikkwalifika bħala l-aħjar numru tlieta mit-13-il grupp tar-rawnd ta’ kwalifikazzjoni. It-Tlieta li ġej, is-Slovakkja u l-Ukrajna jiltaqgħu fil-11.00am filwaqt li Malta tilgħab kontra l-Kosovo fis-2.30pm, biż-żewġ ġpartiti jintlagħbu fis-Centenary Stadium f’Ta’ Qali.
Malta: Luca Camilleri, Kian Vella (Trezeguet Zammit 63), Kaydon Catania (Isaiah Chukunyere 63), Sven Xerri, Ivin Farrugia, Myron Micallef, Ensell Attard (Basil Tuma 46), Lucas Caruana, Zak Barbara (Matthias Fenech 85), Kian Leonardi (Kaiden Fenech 46), Sean Gatt Coach: Paul Gatt
Slovakkja: Jakub Badzgon, Guliano-Antonio Marek, Daniel Prekop, Michal Svoboda, Adam Oravec, Filip Mielke, Tadeas Hajovsky (Maximilian Marko 87), Milan Rehus (David Bordac 17), Lubos Prazenka (Jakun Murko 71), Andy Masaryk (Alexej Maros 46), Zoran Zahradnik Coach: Albert Rusnak
Referee Chrysovalantis Theouli (Ċipru)