Il-Ġimgħa, it-team nazzjonali tan-nisa, immexxi mill-coach Manuela Tessa, jibda l-impenji tiegħu fi Grupp C1 ta’ League C tal-UEFA Nations League 2025, meta taffronta lil-Latvja fi Sloka Stadium, fil-belt ta’ Jurmala, fl-4.30 pm, ħin lokali.
Din qed titqies bħala partita diffiċli għalkemm it-team Malti jista’ jikseb riżultat pożittiv meta l-avversarji huma meqjusa tal-istess livell.
Il-coach ma għandha l-ebda problemi ta’ players neqsin u għaldaqstant fil-jiem li għaddew għażlet l-iskwadra għal din il-logħba kif ukoll għal dik ta’ nhar it-Tlieta li ġej, 26 ta’ Settembru, li se tintlagħab fis-Centenary Stadium, fit-8.00 pm.
Minn din is-sena, in-Nations League, kompetizzjoni internazzjonali bijennali tat-timijiet tal-kbar tan-nisa, se jkollha tliet kampjonati bi promozzjoni u relegazzjoni bejniethom. Iċ-champions se jiġu determinati minn tournament addizzjonali.
L-attenzjoni fuq din il-kompetizzjoni tkompli tissaħħaħ mill-fatt li se taġixxi wkoll bħala parti mill-proċess ta’ kwalifikazzjoni għall-Kampjonat tan-Nisa tal- UEFA, it-Tazza tad-Dinja tan-Nisa tal-FIFA u t-Tournament Olimpiku tal-Football tan-Nisa.
Il-ħames rebbieħa tal-gruppi f’League C se jiġu promossi għal League B, filwaqt li t-tliet timijiet l-aħjar klassifikati fit-tieni post f’League C se jilagħbu kontra t-tliet timijiet l-aħjar klassifikati fit-tielet post ta’ Grupp B. Ir-rebbieħa se jilagħbu fi Grupp B tal-fażi tal-kwalifikazzjoni Ewropea.
L-iskwadra Maltija hija komposta minn:
Goalkeepers: Janice Xuereb (Birkirkara); Maya Cachia (Como – Italja).
Difensuri: Emma Lipman (Como – Italja); Charlene Zammit, Stephania Farrugia, Valentina Rapa, Ann Marie Said (Birkirkara); Jessica Lee Dimech, Emma Xuereb (Swieqi U.); Georgiana Mifsud (Valletta).
Midfielders: Rachel Cuschieri (Sampdoria – Italja); Shona Zammit (Swieqi U.); Brenda Borg (Mgarr U.); Nicole Sciberras (Hibernians); Veronique Mifsud; Gabriella Zahra (Birkirkara).
Attakkanti: Raina Giusti (Birkirkara); Leah Alice Ayres (Hibernians); Maria Farrugia (Lewes FC – Ingilterra); Maya Lucia (NK Split – Kroazja); Haley Bugeja (Inter – Italja); Ylenia Carabott (London Seaward FC – Ingilterra)
Il-biljetti għall-partita kontra l-Moldova jistgħu jinxtraw jew mis-Centenary Stadium stess fil-ġurnata tal-partita, jew onlajn minn fuq is-sit elettroniku tal-Malta FA.
