Il-Kap tal-Kummissjoni Ewropea, Ursula von der Leyen, qiegħda tbati minn pnewmonja severa u kellha tikkanċella l-impenji tagħha għall-ewwel ġimagħtejn ta’ Jannar.
F’aħbar li ħarġet mill-uffiċċju tagħha ntqal li “Hija qed taffaċċja pnewmonja severa,” għalkemm ma ngħataw l-ebda dettalji oħra dwar il-kundizzjoni tagħha jew il-kawża tal-marda.
L-impenji kkanċellati tagħha jinkludu żjara f’Lisbona fejn kellha tagħmel diskors, kif ukoll vjaġġ lejn Gdańsk biex timmarka l-okkażjoni tal-bidu tal-Presidenza tal-Kunsill Pollakk, li se ssir f’data oħra.
Fil-66 sena tagħha, von der Leyen kienet għadha kemm bdiet it-tieni mandat tagħha ta’ ħames snin fit-tmexxija tal-korp eżekuttiv tal-Unjoni Ewropea.
