Floriana Veterans temmew l-ewwel round tal-VMFA Cisk Premier League wara li rebħu l-konfront dirett kontra MFPA bl-iskor ta’ 5-2.
Kienet logħba ferm interessanti bil-Malta Football Players Association li marru minn fuq bil-Greens li dawru l-iskor favurihom u ħadu t-tliet punti finali.
Emerson Amaira, Manolito Micallef, Glenn Bonello, Mark Gauci u Gilbert Scerri skorjaw gowl kull wieħed għal Floriana bl-MFPA li jwieġbu b’doppjetta ta’ George Frendo.
F’logħba ta’ taqtigħ il-qalb sal-aħħar sekonda, Gżira United u Birkirkara St Helen’s ħadu punt kull wieħed wara draw spettakolari ta’ 7-7.
Gżira kienu fil-vantaġġ għal ħafna mid-drabi iżda sabu lill-Karkariżi li dejjem ġabu l-iskor indaqs u saħansitra lejn l-aħħar marru fil-vantaġġ. Madankollu qabel is-suffara finali, il-Maroons skorjaw il-gowl tas-7-7.
Justin Grioli kien l-eroj ta’ Gżira meta skorja tripletta b’Ian Zammit li kien awtur ta’ doppjetta. Daniel Mariano Bueno u Kevin Sammut skorjaw gowl kull wieħed.
Għal Birkirkara, il-plejer Kolombjan Federico Marine skorja hat-trick filwaqt li Christian Caruana sab ix-xibka darbtejn. L-aqwa skorer tal-kampjonat Ayrton Buhagiar u Daniel Cremona żiedu aktar gowls għat-tim tagħhom.
Rabat Veterans irritornaw għar-rebħ wara li għelbu lil Żurrieq Wolves 9-1.
Adam Smeir skorja erba’ gowls għall-Magpies b’Gilbert Camilleri Lowell awtur ta’ doppjetta. Darren Galea, Gareth Magri u Dylan Falzon żiedu aktar gowls għat-tim tagħhom.
Beppe Muscat skorja l-uniku gowl għall-Wolves.
F’logħba min-naħa t’isfel tal-klassifika, Hibernians FC Veterans kisbu l-ewwel tliet punti tal-istaġun wara skor ta’ 7-6 kontra Żejtun Red Stars.
Kienet logħba mimlija gowls fejn l-attakkanti rispettivi rnexxielhom jieħdu vantaġġ minn xi żbalji difensivi.
Hibs kienu qed jirbħu 5-1 sa tmiem l-ewwel taqsima iżda Żejtun wettqu reazzjoni fit-tieni taqsima għalkemm ma kinitx biżżejjed.
Luke Satariano skorja hat-trick għall-Pawlisti filwaqt li Ilia Nazarov, Mauro Brincat, Beppe Antignolo u Adrian Lanzon niżżlu isimhom fost l-iskorers.
Charlo Magro skorja hat-trick għaż-Żwieten b’Charlo Debattista li kien awtur ta’ doppjetta u b’Eric Saliba li baqa’ jagħti t-tama lit-tim tiegħu.
KLASSIFIKA – VMFA Cisk Premier League
Floriana FC 18, Gżira United Veterans 16, MFPA 15, Birkirkara St Helen’s 14, Rabat 10 , Żurrieq Wolves 6, Hibernians 3 , Żejtun Red Stars 0.
KLASSIFIKA L-Aqwa Skorers – VMFA Cisk Premier League
Ayrton Buhagiar (Birkirkara St Helen’s) 16-il gowl, Daniel Mariano Bueno (Gżira United) 14-il gowl, Michael Galea (MFPA), Adam Smeir (Rabat) 12-il gowl, Glenn Bonello 11-il gowl.