Żagħżugħa Maltija ta’ 23 sena li tinsab fi stadju avvanzat ta’ tqala tpoġġiet taħt ordni ta’ probation wara li ammettiet li flimkien ma’ persuni oħra, serqet ammont ta’ flus kontanti u oġġetti oħra minn residenza f’Ħal Qormi.
Il-każ seħħ nhar l-10 ta’ Novembru li għadda. Fil-Qorti ntqal li l-imputata għenet lill-pulizija fl-investigazzjonijiet tagħha u rnexxielhom jidentifikaw terzi li għamlu dan l-allegat serq.
Il-Prosekuzzjoni qalet ukoll li l-mara għandha problema tad-droga u ssuġġerixxiet li tingħata sentenza li tgħinha biex toħroġ minn dan il-vizzju. Kien hawn fejn l-Uffiċjali Prosekuturi nnotaw li f’din l-aħħar ġimgħa, waqt li kienet qiegħda tiġi segwita, il-kambjament li raw fiha kien wieħed tajjeb ħafna.
Il-Qorti preseduta mill-Maġistrat Astrid May Grima sabitha ħatja tal-akkuża miġjuba kontra tagħha u wara li kkunsidrat il-mertu tal-każ kif ukoll is-sitwazzjoni personali tal-imputata, poġġietha taħt ordni ta’ probation kif ukoll taħt ordni ta’ trattament għal perjodu ta’ tliet snin.
Il-Prosekuzzjoni tmexxiet mill-Ispetturi Roderick Agius u Kevin Pulis. L-Avukat Ramon Bonett Sladden deher għall-imputata.