Sal-21 ta’ Ġunju kien hawn 1,578 eKickScooters liċenzjati. Sa issa ma hemm l-ebda pjan sabiex l-użu tal-helmet isir mandatorju meta jiġi misjuq l-e-Scooter.
Dan qalu l-Ministru għat-Trasport, Infrastruttura u Proġetti Kapitali Aaron Farrugia meta kien qed iwieġeb mistoqsija parlamentari li saritlu mid-Deputat Nazzjonalista Ivan Bartolo.
Il-Ministru Farrugia qal li għalkemm l-użu tal-helmet mhuwiex mandatorju, Transport Malta dejjem issuġġeriet li jintuża helmet, bħal fil-każ tas-sewqan tar-roti, fejn helmet ukoll mhix mandatorja li tintuża.
Tenna li sa issa ma hemmx pjanijiet li jsir tibdil ulterjuri fl-infrastruttura tat-toroq biex jakkomoda speċifikatament dan it-tip ta’ sewqan. Madanakollu, l-liġi sussidjarja S.L 499.67 hija ċara fir-rigward ta’ kif, fejn u b’liema veloċità jistgħu jinstaqu l-eKickScooters sabiex tigi ssalvagwardjata s-saħħa u s-sigurtà kemm tas-sewwieq kif ukoll ta’ dawk kollha li qed jagħmlu użu mit-triq jew il-post fejn qed jinstaq l-eKickScooter.
