Novak Djokovic għadda minn konfront epiku ta’ ħames sets kontra t-Taljan, Lorenzo Musetti, fil-French Open, li ntemm fit-03.07 ta’ filgħodu ħin lokali f’Pariġi.
Il-logħba tat-tielet round li ma bdietx qabel l-10.37 pm tas-Sibt, lejn tmiem ġurnata affettwata mix-xita f’Roland Garros, iċ-champion renjanti ssielet lura minn żewġ sets għal wieħed biex rebaħ 7-5 6-7 (6-8) 2-6 6-3 6-0.
Il-player ta’ 37 sena mis- Serbja deher li kien f’xifer li jiġi eliminat mit-tournament mill-ispirat Musetti, li huwa t-30 seed.
Iżda r-riġuvenat Djokovic sab momentum ġdid f’nofs ir-raba’ set, ikkalkula sitt breaks konsekuttivi ta’ service qawwija – u mbagħad saret faċli biex kiseb ir-rebħa fis-set deċiżiv li huwa ħa b’whitewash.
Kien hemm tgħanniqa kordjali bejn il-koppja fi tmiem il-partita, bi Djokovic jingħaqad mal-folla tal-Philippe Chatrier Court biex ifaħħar lill-avversarju tiegħu f’dik li kienet l-aktar tmiem tard fl-istorja ta’ dan l-Open.
Ir-rebħa f’erba’ sigħat u 29 minuta kompliet it-tentattiv tan-numru wieħed tad-dinja għar-raba’ titlu tiegħu f’Roland Garros fejn fl-aħħar 16 se jilgħab kontra t-23 seed, Francisco Cerundolo tal-Arġentina, li għeleb lill-Amerikan, Tommy Paul, 3-6 6-3 6-3 6-2.
“Ma rridx nidħol fuq l-iskeda. Għandi l-opinjonijiet tiegħi iżda naħseb li llum hemm affarijiet kbar fuqhiex nitkellmu f’din il-partita,” qal Djokovic.
“Kemm Lorenzo u l- prestazzjonijiet tiegħi jispikkaw għalhekk ma rridx inkun qed nitkellem dwar l-iskeda. Naħseb li xi affarijiet setgħu ġew immaniġġjati b’mod differenti iżda hemm ukoll sbuħija fir- rebħ ta’ partita daqstant tard.”
Bħala żagħżugħ, Musetti mbotta lil Djokovic mill-qrib fir-raba’ round f’Roland Garros fl-2021 qabel irtira mweġġa’ fil-ħames set.
Iż-żagħżugħ ta’ 22 sena beda veloċi f’din l-okkażjoni wkoll, fejn kiser is-service fit-tielet game tal-partita, għalkemm Djokovic wieġeb immedjatament u mbagħad għeleb lill-avversarju tiegħu f’rally twil biex ikkonverta l-ewwel set point tiegħu.
Iżda Musetti ssielet lura fejn l-ewwel ippareġġa b’tiebreak u wara anke mar minn fuq iżda finalment kienet wisq għat-Taljan li tilef l-aħħar żewġ sets li fihom rebaħ tliet games biss fir-raba’ wieħed.
CARLOS ALCARAZ KONTRA TSITSIPAS
It-tielet seed, l-Ispanjol Carlos Alcaraz, għamel dikjarazzjoni ta’ intenzjoni oħra billi għeleb lil Felix Auger-Aliassime, biex jasal sal-kwarti-finali.
Alcaraz, ta’ 21 sena, rebaħ 6-3 6-3 6-1 kontra l-21 seed Kanadiż f’ġurnata rari mingħajr xita f’Pariġi.
Iċ-champion renjanti ta’ Wimbledon issa se jiffaċċja lid-disa’ seed, il-Grieg Stefanos Tsitsipas fl-aħħar tmienja.
Tsitsipas, li qed jagħmel tentattiv biex jikseb l-ewwel titlu ewlieni tiegħu, ġie minn wara biex għeleb lin- numru 35 tad-dinja, it-Taljan Matteo Arnaldi, 3-6 7-6 (7-4) 6-2 6-2.
Min-naħa tiegħu Alcaraz qed jimmira għall-ewwel titlu tiegħu tal-French Open, wara li diġà rebaħ il-US Open u Wimbledon.
IGA SWIATEK TIBQA’ GĦADDEJJA
In-numru wieħed tad- dinja tan-nisa, il-Pollakka Iga Swiatek, ma setgħetx tikseb rebħa iktar faċli meta ltaqgħet kontra r-Russa, Anastasia Potapova, u għelbitha b’whitewash doppju, 6-0 6-0.
Anke s-seed numru 3, l-Amerikana Coco Gauff għaddiet għall-kwarti-finali meta warrbet lil Elisabetta Cocciaretto tal-Italja, 6-1 6-2.
Marketa Vondrousova tar-Repubblika Ċeka, li hija seed numru 5, kisbet rebħa tajba meta għelbet lis-Serba, Olga Danilovic f’żewġ sets ukoll, 6-4 6-2.
Finalment l-aħħar mara li kkwalifuikat għall-aħħar tmienja l-bieraħ kienet it- Tuneżina, Ons Jabeur, li għelbet lid-Daniża, Clara Tauson, 6-4 6-4.
