Saret rilokazzjoni ta’ 32 immigrant ta’ nazzjonalitajiet varji li kienu waslu b’mod irregolari f’Malta. Dan bħala parti minn strateġija li tiffoka fuq il-prevenzjoni, ir-ritorn u r-rilokazzjoni.
B’hekk, s’a ‘issa, matul din is-sena se jkunu ġew rilokati 104 immigrant irregolari lejn pajjiżi oħra tal-Unjoni Ewropea. Dan filwaqt li dawk li t-talba għall-protezzjoni internazzjonali tagħhom tkun miċħuda qed jintbagħtu lura lejn il-pajjiż tal-oriġini.
Ir-rilokazzjoni saret bħala parti mill-Mekkaniżmu ta’ Solidarjetà Volontarja, maħsub sabiex jitnaqqas il-piż tal-immigrazzjoni irregolari minn fuq pajjiżi tal-fruntiera.
Il-Ministru għall-Intern, is-Sigurtà, ir-Riformi u l-Ugwaljanza Byron Camilleri fakkar li r-rilokazzjoni hija l-iktar mezz effettiv kif pajjiżi oħra Ewropej u l-Unjoni Ewropea jistgħu jnaqqsu l-piż tal-immigrazzjoni irregolari minn fuq il-pajjiżi tal-fruntiera, speċjalment fil-każ ta’ Malta, minħabba d-daqs u l-pożizzjoni ġeografika tagħha. Permezz tal-istrateġija tagħha ta’ prevenzjoni, ritorn u rilokazzjoni, fl-ewwel nofs tal-2023 Malta rnexxielha tnaqqas il-wasliet u tirritorna u tirriloka l-istess ammont ta’ immigranti daqs kemm waslu mill-bidu tas-sena.
“Dan filwaqt li l-gvern qed ikompli jaħdem bis-sħiħ fuq prevenzjoni, inkluż b’koperazzjoni mal-Libja, sabiex tnaqqas il-possibbiltà ta’ mwiet u sussegwentement waslet għal tnaqqis konsiderevoli ta’ wasliet irregolari, u r-ritorn ta’ persuni li ma jkunux jeħtieġu protezzjoni f’Malta. Din il-ħidma qed tiġi riflessa fiċ-ċifri ta’ dawn l-aħħar sentejn fejn in-numri ta’ immigranti irregolari li ġew ritornati lejn pajjiżhom żdied filwaqt li n-numru ta’ wasliet naqas sostanzjalment,” temm jgħid il-Ministru Camilleri.
It-tħejjijiet għar-rilokazzjoni involvew l-assistenza ta’ bosta entitajiet fl-oqsma tas-sigurtà, kif ukoll l-Organizzazzjoni Internazzjonali tal-Immigrazzjoni (IOM) u l- Aġenzija tal-Unjoni Ewropea għall-Ażil (EUAA). Ir-rilokazzjoni hija ko-finanzjata mill-Unjoni Ewropea, fosthom taħt il-Fond għall-Ażil, Migrazzjoni, u Integrazzjoni (AMIF).
