Is-sensiela ta’ festivals tal-iskejjel għall-istaġun 2022-23 spiċċat nhar il-Ġimgħa li għadda b’aktar minn 100 tifla ħadu sehem fir-raba’ u l-aħħar avveniment fil-grawnd tal-futbol tal-Istitut San Ġużepp f’Santa Venera.
B’kollox 10 timijiet minn sitt skejjel ipparteċipaw fil-festival b’St Martin’s College, Chiswick House School, St Catherine High School u Verdala International School jmexxu żewġ timijiet kull wieħed. Magħhom ingħaqdu l-Iskola San Anton u l-Iskola Primarja ta’ San Pawl il-Baħar.
Organizzati mid-Dipartiment tal-Futbol tan-Nisa fi ħdan il-Malta FA u l-Fondazzjoni Inħobb il-Futbol, il-festivals huma mmirati biex jipprovdu aktar opportunitajiet lill-bniet (Year 4 u 5) fl-iskejjel primarji lokali biex jilagħbu l-futbol filwaqt li jkomplu jippromwovu l-logħba fil-livell tal-grasroots.
L-aspett divertenti jingħata ħafna importanza waqt dawn il-festivals u l-feedback li wasal mill-bniet u l-kowċis u l-għalliema tagħhom juri li dan l-għan qed jintlaħaq.
Antonia Limbuwala, li tirrappreżenta lil St Catherine High School, qalet: “Grazzi talli organizzajt dawn it-tournaments. Il-bniet kollha tjiebu ħafna u ħadu gost ħafna. Huma ispirati biex jingħaqdu ma’ klabbs issa u jmorru lil hinn fl-isport.”
Charlotte Sultana Evans, mill-Kulleġġ San Martin, approvat ukoll dawn il-festi, u ddeskriviet din bħala “sena mill-aqwa, u sabiħa li dawn il-festivals jerġgħu lura. Grazzi lill-organizzaturi”. Gayla Umnova, li tirrappreżenta Verdala International School qalet li kienet ħerqana li tieħu sehem f’festival tant mill-aqwa matul is-sena skolastika li jmiss.
Matul il-festival tal-ġimgħa li għaddiet, it-tfajliet parteċipanti ngħataw materjal ta’ informazzjoni dwar il-Kampjonat Ewropew ta’ taħt id-19-il sena tal-UEFA li ġej, li se jsir f’Malta mit-3 sas-16 ta’ Lulju, 2023.
L-iskejjel li jistgħu jkunu interessati li jieħdu sehem f’dawn il-festivals tal-futbol tal-bniet l-istaġun li ġej jistgħu jikkuntattjaw lid-Dipartiment tal-Futbol tan-Nisa billi jibagħtu email fuq [email protected].
