Il-pulizija Żvediża arrestaw mara anzjana li allegatament ħalli- et lit-tifel tagħha maqful għal deċenji ġewwa l-appartament tagħha li jinsab f’subborg fil-kapitali Stokkolma. Skont dak li ġie rrapportat fil-midja tal-lokal, din il-mara ħalliet lil binha maqful fl-appartament għal tliet deċenji sħaħ. Min-naħa tagħha l-omm innegat dawn l-akkużi.
Hu mifhum li dan il-każ ġie skopert minn qarib – li qalet li hija oħt il-vittma – nhar il-Ħadd li għadda wara li l-omm kienet ma tiflaħx u kellha tittieħed l-isptar. Jidher li l-iben, li llum għandu 40 sena, instab ferut u anke jgħix f’kundizzjonijiet ħżiena ħafna. Fil-preżent huwa jinsab fl-isptar fejn qiegħed jiġi operat.
Fid-dawl ta’ dan, il-pulizija ssiġillaw l-appartament li jinsab f’Haninge u bdew investigazzjoni. Huma qegħdin jitkellmu ma’ għadd ta’ persuni bil-għan li jkunu jistgħu jifformulaw l-istorja ta’ verament x’ġara.
L-omm, li għandha 70 sena, se tibqa’ tinżamm fil-kustodja tal-pulizija hekk kif tissokta l-investigazzjoni. Jekk hija tinstab ħatja li żammet persuna kontra l-volontà tagħha hija tista’ teħel ta’ għaxar snin ħabs.
Meta oħt il-vittma kienet qiegħda titkellem ma’ midja lokali hija qalet li kienet telqet mill-appartament ta’ ommha meta kienet għadha żagħżugħa u minn dakinhar ’il hawn hija qatt ma rat lil ħuha. Hija tennet li meta kienet għadha żgħira kemm- il darba pprovat tiġbed l-attenzjoni tal-awtoritajiet hekk kif skontha meta ħuha kellu bejn 11 u 12-il sena hu ma baqax jintbagħat l-iskola.
Hija qalet li wara li ommha ttieħdet l-isptar hi marret fl-appartament u hekk kif fetħet il-bieb rat li dan il-post kien miżmum f’kundizzjoni ħażina immens. Hekk kif sejħet biex tara jekk hemmx xi ħadd fl-appartament ħadd ma weġibha u għalhekk hija bdiet dieħla iktar ’il ġewwa. Ġara li hekk kif resqet lejn il-kċina hija semgħet ħoss u hemm rat raġel bilqiegħda f’kantuniera mudlama b’għadd ta’ feriti f’riġleh. Hija stqarret li hekk kif raha, dan ir-raġel qam bilwieqfa u beda jgħid isimha ripetutament b’vuċi dgħajfa ħafna. L-oħt qalet li ħuha kważi tilef is-snien koll- ha u lanqas kien qiegħed jitkellem ċar. Hija stqarret li minkejja s-snin kollha li għaddew, ħuha għarafha u ma kienx qed jibża’ minnha.
