“Lilek biss inħobb. Lilek biss irrid … Għax f’qalbi inti saltant minn meta konna għadna tfal u dak li bnejna jien u int ma jista’ jkissru ħadd”. Dan huwa vers b’saħħtu minn dak li kapaċi joħroġ mill-pinna ta’ Joseph Calleja fl-aħħar kanzunetta ‘Lilek Biss’ b’kollaborazzjoni mal-kantanta bravissima Maria Cini.
‘Lilek Biss’ hija bbażata fuq storja ta’ mħabba vera li minkejja relazzjoni pjuttost kumplikata tfakkar li dak li nżera’ f’relazzjoni li bdiet bejn żewġt itfal immaturi u moħħ ir-riħ m’hemm xejn li jista’ jkissru għax l-esperjenzi kollha – sbieħ u koroh iffurmaw il-koppja.
L-awtur jikteb dwar ċertu dgħufija min-naħa tal-għarus u l-fatt li minħabba sfidi kbar soċjali minn meta kien għadu tifel, jara fil-maħbuba tiegħu figura ta’ omm li daħlet biex tkun l-ispalla li kellu bżonn meta kien fil-qigħ u kważi ċeda.
Jitratta wkoll l-għira bħala xi ħaġa awtomatika u saħansitra jitlob skuża għal xi drabi saħansitra jaħseb ħażin sforz tal-biża’ li terza persuna tipprova tidħol bejniethom biex tisfratta dak li beda minn “bewsa bil-moħbi quddiem il-bandli tad-dar”.
Bil-koppja f’waħda mill-aktar ġranet sbieħ ta’ ħajjithom fl-isfond, Joseph Calleja u Maria Cini jitkellmu dwar fjamma li nfirxet ġon-nar u univers li donnu jixtieq lill-koppja jibqgħu “flimkien sakemm jasal il-mument jixjieħu t-tnejn u tiġi l-mewt tifridna”.
Din il-kanzunetta ssegwi s-suċċess tal-kanzunetta “Nittama Fikom” li b’kollaborazzjoni ma’ Liston Bongailas messet ir-realtà tal-Parent Alienation, l-innoċenza tat-tfal li ħafna drabi jsibu ruħhom mingħajr vuċi quddiem l-ebusija tar-ras bejn ġenituri li meta tisfaxxa r-relazzjoni ta’ bejniethom jinfexxu f’piki li jkissru dak kollu li jkunu bnew.
Il-kanzunetta għandha produzzjoni ta’ Cyprian Cassar minn Somnio Recording Studios, bi promozzjoni t’Ironic PR & Artist Management.
