Min huwa Daniel Vella?
Għandi 35 sena u tista’ tgħid li fejn jidħlu dawn it-tip ta’ simulaturi, jiena wieħed mill-veterani. Ix-xogħol tiegħi huwa fuq il-karozzi li huma l-passjoni tiegħi sew dawk ta’ veru kif ukoll għal dawn il-logħob li jirrigwardawhom.
Kemm ilek tilgħab il-logħba GT SPORT u liema hija l-karozza li l-aktar tħobb tuża meta ssuq din il-logħba?
L-ewwel logħba li lgħabt kienet Gran Turismo 1 li ħarġet fl-1996 biss m’għandix xi karozza partikolari li nista’ nqis bħala favorita tiegħi.
Il-Kampjonat ASPHALT KINGS li Velocity Esports Racing organizzaw, int irbaħtu mingħajr problemi ta’ xejn. X’ inhi r-reazzjoni tiegħek għal dan is-suċċess miksub f’dan it-tournament tas-sajf?
Ħadt pjaċir immens li kkompetejt f’dan it-tournament u nħossni sodisfatt li rnex-xieli nirbħu. L-organizzazzjoni kienet waħda mpekkabbli biss nixtieq li fil-futur ikun hemm iżjed konkorrenza f’ kompetizzjonijiet bħal dawn.
Kien hemm xi sewwieqa oħra li soqt kontrihom f’dan il-kampjonat li ħallew impressjoni tajba miegħek?
L-aqwa sewwieqa dejjem iħallu mpres-sjoni tajba. Jamie Mangion għażel karozza kkunsidrata bħala “pony” (nota editorjali: il-Peugeot RCZ) biss dejjem kien ma’ ta’ quddiem. Jake Sammut, Kane Mallia Jr u Adrian Manduca wkoll għamlu l-aħjar tagħħom biex jippruvaw ikunu ma’ ta’ fuq.
Liema kienet l-aktar tiġrija li ħadt pjaċir issuq matul dan il-kampjonat?
Nixtieq nagħżel tliet tiġrijiet … biex inkun nista’ nwieġeb għal din il-mistoqsija. L-ewwel tiġrija, dik ta’ Barċellona bqajt ras imb’ras ma’ Adrian Manduca filwaqt li f’Interlagos kien hemm mumenti fejn stajt spiċċajt il-ħames. It-tiġrija tal-Belġju kienet tajba wkoll għax kelli battalja tajba ma’ Jake Sammut.
X’messaġġ tixtieq twassal lid-dilettanti tal-logħba GT SPORT li qed jaqraw din l-intervista qasira?
Nittama li jkun hemm iżjed nies li jagħtu mportanza lil dawn it-tip ta’ logħob għax nemmen li jkunu qegħdin jgħinu fil-veritá … hekk kif bis-saħħa ta’ GT SPORT tgħallimt anke nsuq fid-dinja reali minħabba li qatt ma kont nikkompeti f’ebda tiġrija tal-Go Karts jew f’xi tellieqa tal-karozzi regolari. Nispera wkoll li l-logħba GT Sport Polyphony tibda tqis lil Malta għall-kampjonati li jiġu organizzati mill-FIA għax, għal xi raġuni kemxejn stramba, aħna l-Maltin m’aħniex eliġibbli.