Erba’ persuni nżammew ostaġġi ġewwa sinagoga f’subborg ġewwa Dallas, Texas għal għaxar sigħat sħaħ. Dawn inħelsu qawwijin u sħaħ wara intervent delikat ħafna mill-forzi tas-sigurtà.
Il-każ żvolġa kmieni s-Sibt filgħodu meta numru ta’ persuni kienu qegħdin jattendu għal talb f’sinagoga ġewwa Colleyville. Hekk kif sar magħruf li hemm sitwazzjoni li qiegħda tiżvolġi ġewwa din is-sinagoga, il-pulizija ta’ Texas skejraw numru ta’ timijiet speċjalizzati kif ukoll numru ta’ negozjaturi tal-FBI marru fuq il-post fejn dawn qattgħu sigħat jitkellmu mal-aggressur.
Ftit qabel din is-sitwazzjoni ġiet riżolta nstemgħu numru ta’ tiri t’arma tan-nar u anke splużjonijiet. Il-pulizija qalu li l-aggressur tilef ħajtu. Midja Amerikana qiegħda tirrapporta li b’kollox kien hemm erba’ persuni ostaġġi u fosthom kien hemm ir-rabbi tas-sinagoga. Waqt li seħħ dan il-każ, iċ-ċerimonja kienet qiegħda tiġi mxandra b’mod dirett online. Sitt sigħat wara li dawn il-persuni ttieħdu bħala ostaġġi, l-aggressur ħeles persuna waħda u żamm lit-tlieta l-oħra. Fortunatament ħadd minn dawn ma sofra ġrieħi. Hu mifhum li l-pulizija kellhom jidħlu fil-forza ġewwa is-sinagoga u s’issa għadu mhux magħruf kif miet u min kien l-aggressur.
Waqt ix-xandira li kienet għaddejja fuq Facebook, instema’ leħen ta’ raġel jgħaddat u jgħid “jqabbduni ma’ oħti bit-telefown” u “jien se mmut”. Huwa nstema’ wkoll jgħid li “hemm xi ħaġa ħażina fl-Amerika”. Fil-filmat l-aggressur jinstema’ jitlob għall-ħelsien ta’ Aafia Siddiqui li hija newroxjenzat Pakistana li fil-preżent qiegħda sservi sentenza ta’ 86 sena ħabs ġewwa l-Istati Uniti. Siddiqui kienet instabet ħatja li pprovat toqtol uffiċjali militari tal-Istati Uniti meta kienet fil-kustodja tagħhom ġewwa l-Afganistan.