National Lottery plc u l-Għaqda Ġurnalisti Sports, bi pjaċir iħabbru li Fabio Spiteri rebaħ il-ħames unur tal-IZIBET Elite Athlete Award li jkopri x-xhur ta’ Settembru u Ottubru 2024.
Nhar il-Ħamis 12 ta’ Settembru, Fabio Spiteri sar l-ewwel ultra-triatleta Malti li lesta t-tiġrija DECA f’Garda, fl-Italja. Id-DECA Ultra Triathlon tkopri distanza totali ta’ 2,260 kilometru li hija ekwivalenti għal 10 darbiet tiġrija tal-Ironman. L-atleti huma involuti f’għawma ta’ 38 kilometru, ġirja bir-rota ta’ 1,800 kilometru u ġirja ta’ 422 km, li din tal-aħħar hija ekwivalenti għal 10 tiġrijiet maratona.
Wara li s-sena l-oħra fil-Brażil, Spiteri kellu jirtira minħabba diversi nfafet f’saqajh u uġigħ fil-muskoli, huwa lesta l-isfida tad-DECA ta’ din is-sena fi tnax-il ġurnata u qasam il-linja finali b’ħin totali ta’ 264 siegħa, 51 minuta, u 58 sekonda. B’hekk huwa ġie fis-sitt post minn ħdax-il parteċipant. Spiteri ddedika dan is-suċċess għall-memorja tal-mibki ħabib kbir tiegħu u triatleta Jake Vella u kif ukoll b’risq il-Project 100 li bih qed jimmira illi jiġbor €100,000 għax-xelters għall-annimali f’Malta.
Franco de Gabriele, Chief Commercial Officer ta’ IZI Group kellu kliem ta’ tifħir dwar il-prestazzjoni straordinarja ta’ Fabio Spiteri fejn qal, “Il-fatt li Fabio Spiteri rnexxielu jtemm id-DECA Ultra Triathlon huwa tragward straordinarju. Bħala IZIBET ninagħqdu ma’ Spiteri sabiex niċċellebraw ir-reżiljena, id-dedikazzjoni u l-prestazzjoni atletika li jispikkaw fih. Fuq kollox, nammirraw il-perseveranza tiegħu, li ma ħarisx lura lejn dak li ġralu sena ilu, anzi ta qalbu u saħħtu kollha sabiex wasal fejn wasal. Ma nistgħux ma nsemmux id-dedikazzjoni li għandu Fabio sabiex jiġbor il-fondi għax-xelters tal-annimali, li taw valur miżjud għal dan ir-rikonoxximent għas-suċċess tiegħu.”
Min-naħa tiegħu, Clinton Buhagiar, il-President tal-Għaqda Ġurnalisti Sports qal, “Il-perseveranza u d-determinazzjoni ta’ Fabio Spiteri huma kwalitajiet li wieħed għandu jammirra u fl-istess ħin japprezza. Grazzi għas-sagrifiċji u l-volum kbir ta’ taħriġ, kien possibli sabiex Spiteri jagħmel dak li għamel! Fabio huwa xempju ta’ professjonalità u dedikazzjoni.”
Il-għan tal-IZIBET Elite Athlete Award huwa li jirrikonoxxi s-suċċessi miksuba mill-atleti lokali kull xahrejn.
Il-bord tal-għażla huwa magħmul minn ġurnalisti u osservaturi sportivi li se jkunu qed jevalwaw bir-reqqa il-kisbiet tal-atleti matul ix-xhur u jassiguraw li jkun hemm il-korretezza matul il-proċess kollu tal-għażla.
Ir-regolamenti tal-IZIBET Elite Athlete Award jistgħu jinkisbu minn fuq il-website tal-Għaqda Ġurnalisti Sports https://www.maltasportsjournalists.com/izibet-elite-athlete-award/
