Ferran Pascual ġie kkonfermat bħala coach ta’ Sliema ASC. Minbarra li se jmexxi t-tim tal-irġiel (senior), huwa se jkun responsabbli mid-direzzjoni teknika, il-preparazzjoni u l-prestazzjoni tat-timijiet kollha ta’ Sliema ASC.
Huwa se jmexxi wkoll l-implimentazzjoni tal-metodoloġija tal-BIWPA fil-klabb kollu, u jgħin biex jiġi stabbilit approċċ konsistenti għall-iżvilupp u l-prestazzjoni tal-players.
Bħala eks player professjonali b’aktar minn għaxar snin esperjenza, Ferran ikkompeta fid-División de Honor ta’ Spanja ma’ CN Rubí u lagħab ukoll fil-Portugall u fil-Brażil. Il-karriera tiegħu ta’ kowċ tinkludi t-tmexxija tat-tim tal-irġiel ta’ CN Rubí, ħidma mat-tim nazzjonali tan-nisa tal-Portugall, u t-tmexxija tat-timijiet tal-Portugall fil-Kampjonati Ewropej u Dinjija tal-livell junior.
Ferran ilu membru importanti tal-BIWPA sa mill-bidu tagħha, fejn mexxa programmi ta’ prestazzjoni għolja u clinics internazzjonali f’diversi pajjiżi. Huwa jgħaqqad esperjenza prattika estensiva ma’ kwalifiki fl-Attività Fiżika u l-Isport, kif ukoll l-ogħla ċertifikazzjonijiet tal-kowċing mogħtija mill-federazzjonijiet Katalani u Spanjoli.
