Minn Cristian Muscat
Kif bdiet l-imħabba tiegħek lejn l-atletika?
Minn dejjem kont inħobb l-isport u nitħarreġ xi dixxiplina meta kont żghħra, imbagħad ġie żmien meta waqaft għal kollox. Kelli ħbieb jikkompetu u kont inħobb immur narahom u nagħtihom is-sapport tiegħi meta jkun hemm xi tellieqa. Kulħadd kien jgħamilli kuraġġ biex nibda. Fl-aħħar kelli festin ta’ birthday ta’ ħabiba tagħna u kien hemm Graziella u rnexxielha tikkonvinċieni biex nibda nitħarreġ jien ukoll.
Fil-jiem li għaddew ħadt sehem fil-Maratona ta’ Lisbona. Agħtina iktar dettalji.
Bħalissa qed ngħaqqad is-superhalfs 6 Nofs Maratoni ġewwa l-Ewropa, Lisbona waħda minnhom, diġá lestejt Berlin u Cardiff li s’issa din hi l-iktar waħda favorita. Is-sapport tan-nies u l-atmosfera tagħik l-enerġija li tiġri iktar bil-qalb. Lisbona tlajna bħala grupp tal-klanb li nitħarreġ miegħu Evolve u kien hemm il-kowċ tagħna Has Kesra wkoll magħna li tana ħafna sapport qabel it-tiġrija. Ħdimt ħafna għaliha Lisbona imma ma mortx kif xtaqt, kellna ħafna xita qabel bdejna t-tellieqa imma mbagħad it- temp ħalliena niġru. It-tiġrija ma kinitx organizzata sew għall-ammont kbir ta’ nies li kien hemm u ma stajtx nidħol fil-kaxxa minn fejn kelli nibda u nqbadt fuq wara ma’ nies ta’ pass iktar kajman minni. ma kelliex għażla oħra ħlief li niġri kif nista’ u ngawdi l-mument. Kull tellieqa fiha l-istorja tagħha u nitgħallem minnha. Din ġiet hekk setgħet ġiet agħar. Jien dejjem niringrazzja lil Alla li ma jinqala’ xejn u nasal sal-‘finish line’.
X’suċċessi maġġuri ksibt fil-karriera tiegħek sa issa?
Ma nħossniex xi atleta professjonali. Suċċessi li ksibt kemm ili niġri huma l-ewwel jew it-tieni post fil-grupp tal-etá tiegħi. Bħalissa qiegħda fil-grupp tal 45-49. Li nqum filgħodu u nista’ mmur niġri għaliha huwa biżżejjed għalkemm dejjem naħdem biex nipprova ntejjeb il-ħinijiet li għandi sa issa li huma Nofs Maratona 1:43:22, 10km 46:35 u 5Km 21:47.
Kif tqis il-livell tal-atletika f’pajjiżna fil-preżent?
Bħalissa qed nara ħafna iktar nies jinteressaw ruħhom fl-isport u hawn ħafna atleti tajbin Maltin li anke meta jmorru jikkompetu barra minn xtutna, qed jagħmlu suċċessi għal pajjiżna. Nemmen li bħala pajjiż għandu jagħti ftit iktar sapport lil din id-dixxiplina.
U dak tar-riżorsi fejn titħarrġu u jkollkom il-kompetizzjonijiet tagħkom?
Għalkemm għandna trakka ġdida l-Marsa u xi oħrajn naħseb li dan mhux biżżejjed. Nemmen li għandu jkun hawn iktar postijiet biex l-atleti jkollhom fejn jitħarrġu u forsi meta jinbena xi groawnd f’xi raħal jikkunisdraw li jagħmlu trakka fil-madwar ħalli jinkoraġġixxu iktar nies mil-lokalitajiet jittrenjaw dan l- isport.
Kif qed tħares lejn il-futur tiegħek fl-atletika?
Is-sena d-dieħla nixtieq inkompli s-superhalfs u jekk jirnexxieli nilħaq appilkazzjoni nagħmel Prague u Copenhagen, u jekk il-Bambin jagħtini s-saħħa, inkompli naħdem biex intejjeb il-ħinijiet li għandi u nibda taħriġ għall-Maratona. Nixtieq ħafna jirnexxieli nesperjenzza din id-distanza. Donatella Fenech ħabiba tal-qalb tiegħi dejjem turi mħabba kbira lejja u tgħamilli kuraġġ kbir biex nipprova wkoll.
Għaddi messaġġ finali lil min jixtieq jagħmel karriera ta’ suċċess fl-atletika.
Qatt taqta’ qalbek! Emmen fik innifsek! Fil-ħajja qatt mhu tard biex tibda tipprattika l-atletika jew xi tip ta’ sport ieħor. L-isport jgħinek mhux biss fiżikalment imma anke mentalment u jekk tridt iddaħħal it-taħriġ fir-rutina ta’ ħajtek m’hemmx skużi li l-ħajja mgħaġġla. F’ġurnata żgur ħa ssib siegħa għalik innifsek u taqta’ mir-rutina ta’ kuljum!
