Kimi Antonelli tal-Mercedes kiseb rebħa spettakolari fil-Grand Prix tal-Italja wara li beda t-tellieqa mid-19-il post.
Is-sewwieq Taljan qabeż lill-kollega tiegħu, il-Brittaniku George Russell, li kien beda mit-tieni post, erba’ dawriet qabel it-tmiem, u b’hekk kabbar il-vantaġġ tiegħu fil-kampjonat għal 66 punt.
Din kienet it-tieni l-aktar rebħa impressjonanti minn pożizzjoni baxxa fil-grid fl-istorja tal-Formula 1, wara r-rebħa ta’ John Watson fl-1983 mit-22 post.
Antonelli wera ritmu eċċellenti u sa mill-bidu kien qed jersaq lejn Russell.
Waqfa taħt il-Virtual Safety Car għenitu jnaqqas distakk ta’ 15-il sekonda u eventwalment jaqbeż lil sieħbu. Il-partitarji Taljani ċċelebraw b’entużjażmu kbir.
L-Olandiż, Max Verstappen (Red Bull) spiċċa t-tielet, segwit miż-żewġ sewwieq tal-McLaren, Lando Norris u Oscar Piastri.
Għal Ferrari kienet tellieqa diżappuntanti, b’Lewis Hamilton jispiċċa s-sitta u filwaqt li Charles Leclerc kellu jirtira minħabba li kien involut f’aċċident.
Il-klassifika ġenerali hija (ta’ fuq): 267 – Kimi Antonelli; 201 – George Russell; 191 – Lewis Hamilton; 171 – Lando Norris; 155 – Charles Leclerc; 127 – Max Verstappen; 116 – Oscar Piastri
