Iċ-champion tad-dinja tal-Formula 1 Lando Norris skuża ruħu pubblikament ma’ Franco Colapinto wara li qal li s-sewwieq Arġentin kellu jiġi sospiż minħabba l-inċident li kkawża fil-Grand Prix tal-Azerbaijan.
L-inċident seħħ wara s-safety car meta Colapinto illokkja r-roti tiegħu u laqat lil sieħbu fit-tim Alpine, Pierre Gasly, li mbagħad daħal f’Norris. It-tliet sewwieqa kellhom jirtiraw mit-tellieqa.
Wara l-inċident, Colapinto ammetta li kien għamel “żball kbir” u talab skuża. Madankollu, Norris, maqbud mill-emozzjonijiet wara l-ħabta, qal li s-sewwieq Arġentin kellu jingħata sospensjoni. Aktar tard, iżda, Norris irrikonoxxa li l-kummenti tiegħu kienu żbaljati u mhux xierqa.
F’messaġġ ippubblikat fuq Instagram, Norris spjega li wara t-tiġrija bagħat messaġġ privat lil Colapinto biex jiskuża ruħu. Huwa qal li jaf sew li żbalji bħal dawn huma parti mit-tiġrijiet u fakkar li anke hu għamel diversi żbalji matul il-karriera tiegħu. Norris sostna li l-intensità tal-mument u d-diżappunt wara t-tiġrija ma jistgħux jintużaw bħala skuża għall-kliem li qal.
Is-sewwieq Brittaniku żvela wkoll li hu u Colapinto solvew il-kwistjoni bejniethom u li għadhom ħbieb tajbin. It-tnejn jinsabu ffukati fuq it-tiġrija li jmiss u jridu jħallu l-inċident warajhom.
Fir-rigward tal-konsegwenzi sportivi, Colapinto ngħata penalitá ta’ 10 sekondi waqt it-tellieqa. Peress li kien diġà rtira, il-penalitá ġiet ikkonvertita f’tnaqqis ta’ ħames postijiet fuq il-grid tat-tluq għat-tellieqa li jmiss fil-Bahrain. Dan ifisser li l-Arġentin se jkollu sfida addizzjonali hekk kif jipprova jirkupra minn tmiem il-ġimgħa diffiċli u jerġa’ jikseb ir-riżultati pożittivi fil-kampjonat.
