Ġimgħa importanti għall-futsal Malti hekk kif intlagħbu erba’ semifinali fil-kampjonat maskili, li wasslu biex issa sirna nafu l-finalisti tal-Challenge League kif ukoll l-ewwel riżultati tas-semifinali tal-Premier Final Four.
Fis-semifinali tal-elite futsal, rajna lil University Futsal jiksbu rebħa ta’ 4-1 fuq Marsaskala f’partita fejn it-tim rebbieħ kellu ħafna pussess tal-ballun. Minkejja r-riżultat, Marsaskala wrew dixxiplina difensiva tajba u baqgħu kompetittivi tul il-konfront. Fit-tieni semifinali, Luxol St Andrews iddominaw kompletament il-logħba kontra Birżebbuġa, b’rebħa kbira ta’ 11-1. Iċ-champions renjanti wrew is-saħħa u l-esperjenza tagħhom, u bagħtu messaġġ ċar lill-avversarji tagħhom.
It-tieni leg tas-semifinali jintlagħab nhar il-Ġimgħa, 1 ta’ Mejju, u minkejja r-riżultati tal-ewwel logħbiet, kollox għadu possibbli. Rebħa fiż-żmien regolamentari tista’ twassal għal ħin supplementari u anke penalties, li jfisser li l-konfronti għadhom miftuħin.
Fis-semifinali tal-Challenge League, Malta Futsal U19 kisbu l-ewwel finali storika tagħhom meta għelbu lil Sliema Fort Fitness Futsal b’rebħa kbira ta’ 11-0. Protagonist ewlieni kien Luke Urpani li skorja erba’ gowls u kellu prestazzjoni mill-aqwa. Fis-semifinali l-oħra, Żejtun Corinthians għelbu lil St Venera Lightnings bl-iskor ta’ 7-4 f’partita mimlija azzjoni u gowls. B’hekk, il-finali tal-Challenge League se tintlagħab bejn Malta Futsal U19 u Żejtun Corinthians, f’konfront li jwiegħed spettaklu sabiħ għall-partitarji tal-futsal Malti.
