Thursday, March 28, 2024

Ġurnalisti ta’ One jaċċettaw apoloġija, iżda Bernard Grech għandu jġorr ir-responsabbiltà

Aqra wkoll

Ġurnalist u cameraperson ta’ One aċċettaw l-apoloġija ta’ persuna li nhar il-Ħamis waqt il-protesta tal-Partit Nazzjonalita beżqilhom, għajjarhom u anke heddidhom.

L-aġir ostili seħħ ukoll minn membri oħrajn tal-folla li kien hemm għal protesta.
L-apoloġija saret permezz ta’ komunikazzjoni li l-persuna bagħtet lill-Istitut tal-Ġurnalisti Maltin (IĠM), liema komunikazzjoni ġiet mgħoddija lil ONE.

Kienet il-kumpanija One Production Ltd li qalet li fid-dawl tal-fatt li din l-apoloġija ġiet aċċettata, iż-żewġ vittmi ma fetħux kwerela mal-Pulizija.

Il-kumpanija qalet li, filwaqt li dak li seħħ il-Ħamis hu aġir inaċċettabbli u ta’ min jikkundannah, din id-deċiżjoni ttieħdet ukoll fid-dawl tal-fatt li l-folla kienet imħeġġa tkun ostili u mhux paċifika mill-Kap tal-Partit Nazzjonalista, Bernard Grech, innifsu. Dan seħħ bl-aġir tiegħu fil-Parlament u barra minnu, tant li x’ħin ħareġ u ra li mhux aggressivi biżżejjed beda jinċitahom u jgħidilhom, “Qumu minn hemm”.

Għalhekk, għandu jkun hu li jerfa’ r-responsabbiltà ta’ dan l-aġir u mhux min, anke jekk ħażin ħafna, waqa’ vittma għall-eżempju ħażin tiegħu.

L-istqarrija qalet li, quddiem il-provokazzjoni tal-Oppożizzjoni, wieħed jibqa’ jappella għall-kalma u s-serenità. Kif qal il-Prim Ministru, Robert Abela, dalgħodu, dan huwa pajjiż sabiħ li miexi ’l quddiem għax għandu poplu magħqud li jaħdem flimkien. Filwaqt li nistgħu ma naqblux, dan għandu jsir b’rispett.

Ekonomija

Sport