Is-Sindku ta’ San Ġwann Trevor Fenech qal li l-ġurnata tal-bieraħ hija waħda li titniżżel fl-istorja tal-lokalità.
Dan hekk kif lbieraħ laqgħu lill-Eċċellenza Tiegħu l-Arċisqof ta’ Malta, Mons Charles Scicluna, li kien preżenti għaċ-ċerimonja ta’ tqegħid ta’ disa’ stilel tad-deheb fuq it-Titular tal-Knisja Parrokjali, regalati mill-membri tal-Għaqda Mużikali Madonna ta’ Lourdes.
Dan wara li l-istess Titular ġie rrestawrat mill-Kunsill Lokali. Is-Sindku faħħar ukoll lill-President tal-Każin tal-Banda, Andre Genovese, għall-ħidma kontinwa tiegħu.
“Mumenti bħal dawn juru s-saħħa li l-lokal ikollu meta jkun hemm l-għaqda. Grazzi kbira lill-Kappillan tagħna, Fr Emanuel Abela, li bil-ħidma tiegħu fil-lokal, illum għandna komunità magħquda u b’saħħitha. Flimkien inkomplu nagħmlu San Ġwann aħjar”, tenna Fenech.