Il-Fondazzjoni BOV appoġġjat ir-restawr tal-pittura tal-Madonna tar-Rużarju fil-Knisja Parrokkjali ta’ Marija Reġina fil-Marsa, u b’hekk għenet fil-preservazzjoni ta’ din il-pittura tas-seklu tmintax maħduma biż-żejt fuq it-tila. Attribwita lill-iskola ta’ Francesco Zahra, wieħed mill-aktar pitturi rinomati Maltin ta’ xogħlijiet reliġjużi, il-pittura tirrifletti l-karattru rikk tal-perjodu Barokk f’Malta.
Il-pittura turi lill-Verġni Marija flimkien mat-Tarbija Ġesù, imdawra bl-anġli, waqt li qed tippreżenta r-Rużarju lil San Duminku, li jidher għarkupptejh fuq in-naħa tax-xellug liebes il-libsa distintiva bajda u sewda tal-Ordni Dumnikan. Maġenbu jidher kelb, wieħed mis-simboli tradizzjonali tiegħu. Fuq in-naħa tal-lemin, Santa Katerina ta’ Siena liebsa l-ilbies Dumnikan, flimkien ma’ simboli tat-talb u l-kontemplazzjoni, fosthom kranju, ktieb miftuħ u ġilji.
Il-proġett ta’ konservazzjoni ġie fdat lit-tim ta’ PrevArti, li permezz ta’ intervent metikoluż reġa’ ħareġ il-valur artistiku tal-pittura. Pierre Bugeja, Fundatur u Konservatur Anzjan ta’ PrevArti, qal li dan ix-xogħol kien meħtieġ minħabba diversi interventi preċedenti li kienu saru matul is-snin u li kienu għattew il-pittura b’saffi ta’ żebgħa miżjuda li oskuraw id-dehra tal-pittura.
Is-Sur Bugeja spjega li l-proċess kien jinvolvi t-tneħħija tat-trab u l-ħmieġ akkumulati, tal-verniċ li kien iddeterjora maż-żmien, kif ukoll ta’ kull irtokk li kien sar f’interventi preċedenti. Ix-xogħol kien jinkludi wkoll il-konsolidazzjoni ta’ żoni fejn is-saff tal-pittura kien beda jinqala’, kif ukoll it-tisħiħ tas-sostenn tat-tila bil-għan li jissaħħu l-fibri tagħha. Barra minn hekk, ġew indirizzati deformazzjonijiet fit-tila, filwaqt li ż-żoni fejn kien hemm telf ta’ materjal ġew mimlija u mogħtija wiċċ uniformi permezz ta’ ġibs ta’ restawr. Innota li l-konservaturi użaw teknika etika u kompletament riversibbli sabiex jimminimizzaw l-impatt viżiv ta’ dawn it-telfiet fuq l-estetika ġenerali tal-pittura. Il-proġett ġie dokumentat b’mod komprensiv, b’reġistri dettaljati kemm qabel kif ukoll wara l-proċess ta’ konservazzjoni. Il-proġett ġie konkluż billi nħadem gwarniċ dekorattiv ġdid indurat bid-deheb, maħdum permezz ta’ metodi tradizzjonali u mfassal biex jikkumplimenta l-karattru storiku tal-pittura restawrata.
Il-pittura restawrata reġgħet tpoġġiet fil-Knisja Parrokkjali ta’ Marija Reġina fil-Marsa, fejn ġiet esposta f’post prominenti sabiex il-parruċċani u l-viżitaturi jkunu jistgħu japprezzawha aħjar.
Waqt l-inawgurazzjoni, Ernest Agius, Deputat Chairperson tal-Fondazzjoni BOV u Chief Operations Officer tal-Bank, irringrazzja lil Pierre Bugeja u lit-tim tiegħu għax-xogħol eċċellenti li wettqu. “Il-Bank u l-Fondazzjoni BOV huma kburin li qed jgħinu komunità oħra tħares u tippreserva opra tal-arti li tirrifletti l-wirt kulturali għani ta’ Malta u d-devozzjoni tal-poplu tagħha,” qal is-Sur Agius. “L-appoġġ tagħna huwa xhieda tal-impenn li nibqgħu msieħba ta’ fiduċja għall-komunitajiet li naqdu.”
Is-Sur Agius enfasizza wkoll ir-rwol usa’ tal-Bank fil-ħarsien tal-patrimonju artistiku ta’ Malta u Għawdex, filwaqt li nnota li l-kultura u l-wirt kulturali jiffurmaw wieħed mill-ħames pilastri li jiggwidaw il-missjoni tal-Fondazzjoni BOV. Permezz tal-ħidma tagħha, il-Fondazzjoni tappoġġja wkoll inizjattivi fil-qasam tal-inklużjoni soċjali, l-imġiba etika, l-edukazzjoni, u s-sostenibbiltà ambjentali.
Huwa żied jgħid li dawn l-isforzi huma msaħħa minn għadd ta’ inizjattivi oħra, fosthom il-leave għal volontarjat mogħti lill-impjegati, li jirrifletti l-konvinzjoni tal-Bank li l-impenn fil-komunità joħloq valur kemm għall-organizzazzjonijiet u l-individwi li jibbenefikaw mill-appoġġ tiegħu, kif ukoll għall-membri tal-istaff li jagħtu mill-ħin tagħhom.
