Il-Gwardji tal-Kosta Franċiżi qal li kienu salvaw madwar 100 immigrant fi tliet operazzjonijiet differenti waqt li kienu qegħdin jipprovaw jaqsmu bejn Franza u r-Renju Unit.
F’waħda mill-operazzjonijiet ġew salvati 106 persuni li kienu qegħdin jivvjaġġaw fuq dgħajsa waħda u għal xi raġuni din kienet inqalbet.
L-ewwel operazzjoni saret nhar is-Sibt filgħaxija fejn l-immigranti ġew salvati u tpoġġew fuq bastiment tal-Gwardji tal-Kosta fejn ittieħdu lejn Calais.
Kelliem għall-Gwardji tal-Kosta qal li din iż-żona tal-baħar hija waħda mill-aktar żoni traffikużi fid-dinja u ħafna drabi l-kundizzjonijiet tal-baħar ma tantx ikunu tajbin.
Għalhekk b’mod kontinwu l-Gwardji tal-Kosta qegħdin iwettqu operazzjonijiet tas-salvataġġ fejn numru kbir ta’ immigranti qegħdin jipprovaw jaqsmu fuq dgħajjes żgħar bejn iż-żewġ pajjiżi.
