Waqt il-panel ta’ diskussjoni Ruth Sciberras minn MARAM qalet li hemm bżonn ngħinu anke lill-agressur f’każijiet ta’ vjolenza domestika u dan anke biex ikun evitat li jkun hemm vittmi oħra.
Fil-konferenza tal-lum, “Niċċelebraw 30 Sena ta’ Għajnuna lill-Vittmi ta’ Vjolenza Domestika”, Sciberras spjegat li l-professjonisti fil-qasam tal-vjolenza domestika f’Malta huma ħafna u kollha jaħdmu ħafna biex jiġġieldu din il-pjaga soċjali.
Filwaqt li speċifikat li t-taħriġ tagħhom sar barra minn Malta, hija qalet li xi drabi jkunu involuti mat-18-il professjonist f’każ ta’ vjolenza domestika u f’dawk il-każijiet urġenti li jkunu qegħdin idumu biex jinstemgħu fil-Qorti huma jiġbdu l-attenzjoni biex jitħaffef il-proċess fi żmien meta l-vittma tkun għaddejja minn perjodu diffiċli ħafna u ta’ sfida.
