Fil-jiem li ġejjin, se tibda tinstema’ l-kawża ta’ libell li fetaħ il-Ministru għas-Saħħa u l-Anzjanità Attiva Jo Etienne Abela fil-konfront ta’ żewġ persuni oħra dwar kummenti “malafamanti” li kienu għamlu fuq Facebook.
Il-Ministru Abela, li fetaħ il-kawża kontra Albert Mamo u Natalie Xuereb, qed jisħaq li l-kummenti li dawn tefgħu fuq il-paġna ta’ Lovin Malta fit-18 t’Ottubru 2024 taħt l-artiklu “New MRI Machine Unveiled in Gozo to Enhance Healthcare Services”, fejn fost oħrajn jallegaw li huwa rċieva commissions (b’rabta ma’ dan il-proġett), huma libellużi u malafamanti fil-konfront tiegħu.
Huwa saħaq ukoll li dawn il-kummenti għandhom bħala skop li joffendu l-unur u r-reputazzjoni personali u professjonali tiegħu u jesponuh għar-redikolu u d-disprezz tal-pubbliku.
Il-kawża hi differita għas-smigħ għas-seduta ta’ nhar it-Tlieta 15 t’April 2025, fit-8.15 a.m. fl-edifizzju tal-Qorti t’Għawdex.