Il-Prim Ministru tal-Awstralja wiegħed li se jieħu azzjoni qawwija wara attakk ta’ ħruq intenzjonat fuq sinagoga f’Melbourne.
Il-pulizija qed tfittex raġel li l-Ġimgħa filgħaxija deher ixerred likwidu mal-bieb tas-sinagoga qabel ħa n-nar. Madwar 20 persuna li kienu qed jieklu ġewwa dak il-ħin ġew evakwati mingħajr ebda ġrieħi.
Il-pulizija qed tipprova wkoll tiddetermina jekk l-inċident huwiex relatat ma’ attakk fuq restorant ta’ proprjetà Lhudija fil-belt fl-istess lejl.
F’dawn l-aħħar xhur, seħħew sensiela ta’ attakki antisemitiċi fl-Awstralja, li jidher li kienu mqanqla minn tensjonijiet dwar il-gwerra bejn Iżrael u l-Ħamas.
Il-Gvern Awstraljan ħatar mibgħut speċjali biex jiġġieled l-antisemitiżmu u għadda wkoll liġijiet ħorox kontra r-reati ta’ mibegħda wara numru ta’ attakki “ta’ profil għoli.”
“L-antisemitiżmu m’għandux post fl-Awstralja,” qal il-Prim Ministru Anthony Albanese wara l-attakk fuq is-sinagoga ta’ East Melbourne. “Dawk responsabbli għal dawn l-atti xokkanti jridu jiffaċċjaw il-forza sħiħa tal-liġi u l-gvern tiegħi se jipprovdi l-appoġġ kollu meħtieġ għal dan l-isforz,” qal Albanese.