Il-Pulizija kompliet għaddejja bl-investigazzjonijiet tagħha b’rabta mal-qtil ta’ Eric Borg, żagħżugħ ta’ 27 sena mir-Rabat.
Sadanittant, fi żvilupp ieħor, il-Pulizija bdiet tinterroga persuna suspettata b’dan il-qtil, li huwa raġel ta’ 40 sena mir-Rabat.
Il-każ seħħ nhar l-ewwel tas-sena, għall-ħabta tat-3.30 p.m., fi Triq il-Fidloqqom, ir-Rabat. Jingħad li s-suspettat u l-vittma kienu involuti argument bejniethom.
Waqt dan l-argument intużat arma tan-nar fejn Borg intlaqat minn żewġ tiri u tħalla mixħut fuq il-bankina. L-allegat aggressur kien ħarab minn fuq il-post iżda ġie arrestat ftit sigħat wara.
Tim mediku kien imsejjaħ sabiex jassisti iżda sfortunatament Borg kien iċċertifikat mejjet fuq il-post. Xhieda fuq il-post li tkellmu ma’ dan il-ġurnal qalu li semgħu l-ewwel tir segwit minn għajjat u sussegwentement instema’ t-tieni tir.
Huwa mifhum li l-Pulizija waslet għal ċertu konklużjonijiet wara li rat filmati miġbuda minn kameras tas-sigurtà fl-inħawi.
Il-Maġistrat Charmaine Galea qiegħda tmexxi l-inkjesta b’rabta ma’ dan l-ewwel omiċidju għal din is-sena.
L-investigazzjonijiet tal-Pulizija għadhom għaddejjiin.
