Il-president tal-FIFA, Gianni Infantino, qed jiffaċċja pressjoni mill-UEFA u l-CONCACAF, li qed jsostnu li l-organizzazzjoni tista’ tqassam aktar minn $2 biljun lill-211-il assoċjazzjoni membru tagħha mingħajr ma tbigħ ishma fit-Tazza tad-Dinja.
F’ittra konġunta, Aleksander Ceferin u Victor Montagliani qalu li kull assoċjazzjoni tista’ tirċievi $10 miljun, filwaqt li l-FIFA żżomm riżervi ta’ $2.6 biljun.
Huma appellaw għal aktar trasparenza wara l-kontroversja dwar il-pjan ta’ Infantino li joħloq entità ġdida biex tbigħ sehem ta’ 20% fit-Tazza tad-Dinja u kompetizzjonijiet oħra.
Il-pjan ġie rtirat wara reazzjoni internazzjonali qawwija. Iż-żewġ konfederazzjonijiet qed jipproponu wkoll fondi addizzjonali għall-konfederazzjonijiet u l-unjonijiet reġjonali.
