Proprju llum jingħata bidu għat-tieni round tal-BOV Kampjonat Premier bl-aqwa partita tkun bejn ir-rivali Hibernians u Valletta filwaqt li l-leaders Hamrun Spartans jibdew favoriti li jiksbu t-tliet punti meta jilagħbu kontra Marsaxlokk.
Ta’ nota huwa l-fatt li dan il-programm se jintlagħab kmieni minħabba li nhar is-Sibt u l-Ħadd se jintlagħbu l-aħħar żewġ logħbiet tat-Tazza tad-Dinja … dik għat-tielet post li tkun segwit bil-finali.
Hibernians v Valletta – Dan huwa konfront bejn żewġ rivali li ġejjin minn rebħa … Hibernians fuq Floriana (1-0) u Valletta fuq Marsaxlokk (2-1).
Bħalissa Hibernians jinsabu fit-tieni post tal-klassifika u b’ċans tajjeb li jikkwalifikaw għall-UEFA Conference League.
Il-Pawlisti għandhom vantaġġ ta’ disa’ punti fuq il-Beltin li jinsabu fit-tmien post, b’dawn tal-aħħar jimmiraw għal rebħa biex jibqgħu jittamaw li jistgħu jisfidaw għal post f’kompetizzjoni Ewropea.
Iż-żewġ timijiet għandhom player sospiż – Ferdinando Apap għal Hibernians u Eslit Sala għal Valletta.
Fl-ewwel round iż-żewġ timijiet temmew fi draw ta’ 1-1.
Sta Lucia v Gzira U. – Gzira United jilagħbu kontra Sta Lucia fejn iridu jkomplu jibnu fuq ir-rebħa ta’ 2-0 fuq Zebbug Rangers minħabba li fiż-żewġ partiti preċedenti huma kisbu biss punt u għaldaqstant ma jistgħux jitilfu l-kuntatt mat-timijiet ta’ fuqhom.
Min-naħa ta’ Sta Lucia, dawn jinsabu fil-post ta’ qabel l-aħħar u għaldaqstant rebħa għalihom hija imperattiva hekk kif tidher li l-ġlieda għas-salvazzjoni se tinkludi wkoll lil Zebbug Rangers u lil Pietá Hotspurs.
Iż-żewġ timijiet m’għandhomx problemi ta’ players neqsin filwqt li l-Gżirjani jkunu msaħħa bir-ritorn ta’ Gabriel Bohrer Mentz u Jefferson De Assis minn sospensjoni.
Fl-ewwel round il-Maroons ħarġu rebbieħa bl-iskor ta’ 3-1.
Sirens v Birkirkara – Sirens għandhom partita diffiċli meta jiltaqgħu kontra Birkirkara fejn jimmiraw li jpattu għat-telfa ta’ 2-0 tal-ewwel round.
Filwaqt li huma jinsabu fl-għaxar post, l-Istripes qed igawdu t-tielet post fejn jimmiraw għat-tielet rebħa konsekuttiva biex ikomplu l-isfida tagħhom għat-tieni post hekk kif tidher ċara d-destinazzjoni tat-titlu.
L-uniku player sospiż huwa dak ta’ Birkirkara, Kurt Zammit.
Gudja U. v Mosta – Gudja United jiffaċċjaw lil Mosta fejn l-għan tagħhom huwa li jilħquhom fil-ħames post tal-klassifika.
Filwaqt li l-Gudjani tilfu ħamsa mill-aħħar seba’ logħbiet, il-Mostin rebħu ħamsa mill-aħħar sebgħa biex b’mod gradwali qabżuhom fil-klassifika.
Għal din il-partita, iż-żewġ timijiet mistennija jinżlu bl-aqwa formazzjoni possibbli b’Gudja jkunu msaħħa bir-ritorn ta’ Farid Romero Zuniga minn sospensjoni.
Fl-ewwel round, Gudja ħarġu rebbieħa bl-iskor ta’ 1-0.
Zebbug R. v Balzan – Din hija partita bejn żewġ timijiet li ġejjin minn telfa bil-pressjoni tkun fuq Zebbug Rangers li xejn għajr minn rebħa ma tissodisfa l-kriterji tagħhom.
Min-naħa ta’ Balzan, jinsabu xxamplati f’nofs il- klassifika ‘l bogħod mill-biżgħa tar-relegazzjoni iżda jinsabu wkoll ‘il bogħod milli jisfidaw għal post fl- Ewropa.
Huma jimmiraw li jagħmlu double fuq iż-Żebbuġin meta fl-ewwel round kienu ħarġu rebbieħa bl-iskor ta’ 3-1.
Iżda huma għandhom liż-żewġ players, Samir Arab u Milos Zlatkovic, sospiżi.
Marsaxlokk v Hamrun S. – Il-leaders Hamrun Spartans jiffrontaw lil Marsaxlokk li ilhom ma jirbħu għal dawn l-aħħar ħames partiti li fihom kisbu biss żewġ punti … biex l-aspettattiv li jispiċċaw fin-naħa ta’ fuq tal-klassifika ħadu daqqa ta’ ħarta kbira meta jinsabu fil-11-il pożizzjoni.
Min-naħa tal-Ħamruniżi, ma għandhom l-ebda pressjoni fuqhom minħabba li għandhom vantaġġ ta’ seba’ punti fil-quċċata u għaldaqstant il-coach jista’ jagħmel rotazzjoni ta’ players.
Fil-veritá, kif jidhru l-affarijiet dan il-kampjonat se jiżvolġi f’purċissjoni meta wieħed jistenna li l-Ispartans se “jaħarbu” waħedhom.
Huma mistennija jinżlu bl-aqwa formazzjoni possibbli minħabba li l-players huma kollha għad-dispożizzjoni.
Min-naħa tagħhom, Marsaxlokk għandhom lil Emerson Vella sospiż iżda huma se jkunu msaħħa bir-ritorn tat-tliet players, Oscar Carniello, Kristian Keqi u Juan Cruz Aguilar, minn sospesjoni.
Fl-ewwel round, l-Ispartans rebħu bl-iskor ta’ 1-0.
Pietá H. v Floriana – Floriana jiltaqgħu kontra Pietá Hotspurs li jinsabu fil-qiegħ tal-klassifika.
Il-Greens jimmiraw li jirritornaw għar-rebħ wara li fl-aħħar żewġ logħbiet huma kisbu biss punt.
Anke l-Hotspurs jimmiraw għal rebħa wara li kisbu biss punt mill-aħħar sitt ħarġiet.
Iż-żewġ timijiet għandhom player sospiż – Christian Rutjens għal Floriana u Zean Leonardi għal Pietá.
Fl-ewwel round Floriana kien rebħu 2-0.
PROGRAMM KOLLU:
Illum
Centenary Stadium
6.30 pm: Sta Lucia v Gzira U.
Għada, 16 ta’ Diċembru
Tony Bezzina Stadium
6.00 pm: Sirens v Birkirkara
8.15 pm: Gudja U. v Mosta
National Stadium
6.00 pm: Zebbug R. v Balzan
8.15 pm: Marsaxlokk v Hamrun S.
Is-Sibt, 17 ta’ Diċembru
Tony Bezzina Stadium
1.00 pm: Pietá H. v Floriana
Tony Bezzina Stadium
1.00 pm: Hibernians v Valletta
