Meta llum jissokta l- BOV Kampjonat Premier wara l-festi tal-Milied u wara d-dewmien minħabba l-Covid-19, l-aktar partita li tispikka tkun dik bejn ir-rivali eterni, Valletta u Floriana.
Il-leader Hibernians jilagħbu kontra Sirens f’dik li hija mequsa bħala partita delikata filwaqt li fuq il-karta Hamrun Spartans m’għandhomx ifallu kontra Mosta.
Valletta v Floriana – Din hija l-aqwa partita ta’ dan il-programm fejn Valletta għandhom iċ-ċans li jpattu għad-diżappunt tat-telfa tal-ewwel round bl-iskor ta’ 3-0 kontra Floriana.
Iżda l-affarijiet qed jidhru tajbin għal dawn tal-aħħar fit-tentattiv li jtemmu mal-aħħar erbgħa u rebħa tfisser li minbarra jsaħħu t-tieni post, jiftħu vantaġġ ta’ sitt punti fuq l-istess Beltin.
Min-naħa l-oħra, Valletta għandhom bżonn jirritornaw lura għar-rebħ wara li sofrew żewġ telfiet suċċessivi, kontra Hamrun Spartans (1-0) u Balzan (2-1).
Din hi sitwazzjoni delikata għalihom u ma jistgħux iwaqqgħu aktar punti.
Huma se jkollhom jgħaddu mingħajr is-sospiż James Arthur filwaqt li Christian Rutjens u Jose Arias Ulises se jirritornaw għal Floriana minn sospensjoni.
Hamrun S. v Mosta – Hamrun Spartans jiffaċċjaw lil Mosta u għalkemm jibdew bħala favoriti, jinsabu konxji mill-fatt li ma jistgħux jiżolqu hekk kif jinsabu distakkati 10 punti mil-leaders Hibernians b’logħba inqas.
Pass falz ikun ifisser li jċedu t-taqtiegħa għar-rebħ tat-titlu hekk kif il-Pawlisti rari jwaqqgħu xi punti u jistgħu jisparixxu mill-orizzont!!
Filwaqt li l-Ispartans jimmiraw għar-raba’ rebħa konsekuttiva, se jfittxu li jagħmlu aktar pressjoni fuq Mosta li qed jissieltu kontra r-relegazzjoni hekk kif jinsabu fiż-żona l-ħamra kif ukoll ikunu qed ifittxu l-ewwel rebħa f’sitt ħarġiet.
Fl-ewwel round, Hamrun rebħu 2-1 u għaldaqstant jimmiraw li jirrepetu dan is-suċċess.
Huma se jkunu mingħajr il-Marokkin Soufiane Lagzir li telaq jilgħab fis-Serie D fl-Italja. Min-naħa l-oħra, Mosta se jkunu mingħajr is-sospiż Tyrone Farrugia.
Sliema W. v Gzira U. – Dan huwa konfront bejn żewġ ġirien li s’issa ddiżappuntaw.
Filwaqt li Gzira United jinsabu sitt punti biss fuq iż-żona tar-relegazzjoni, Sliema Wanderers għadhom qed ifittxu l-ewwel rebħa tagħhom fi 12-il ħarġa, fejn irreġistraw tmien telfiet bil-konsegwenza li jinsabu fil-qiegħ tal-klassifika … tmien punti ‘l bogħod mis-salvazzjoni u fir-realtà jinsabu f’periklu kbir li jitilfu posthom mal-kbar għat-tieni darba fl-istorja
Min-naħa tal-Maroons, jimmiraw għal rebħa biex isaħħu ċ-ċansijiet tagħhom għaċ-Championship Pool.
Il-Wanderers issaħħew bil-firma ta’ Matteo Piciollo, Oscar Linton u Martin Davies, iżda jinsabu mingħajr is-sospiż Kurt Shaw.
Il-Maroons ffirmaw żewġ difensuri Kroati, Antonio Pavic u Marco Cosic, iżda Luke Tabone u Jackson Mendoza huma t-tnejn sospiżi.
Fl-ewwel round iż-żewġ timijiet ħadu punt kull wieħed fi draw ta’ 1-1.
Hibernians v Sirens – Hibernians jaffrontaw lil Sirens fejn jimmiraw li jkomplu jsaħħu l-ewwel post hekk kif jinsabu tmien punti fuq Floriana.
Iżda Sirens, li jinsabu żewġ punti ‘l bogħod mir-raba’ post, jimmiraw li jagħtu l-ewwel telfa lill-Pawlisti.
Fl-aħħar partita tagħhom iż-żewġ timijiet irreġistraw rebħa – Hibernians għelbu lil Gudja United 2-1 u Sirens għelbu lil Mosta 3-2.
Iżda Hibs skorjaw il-goal tar-rebħa fil-ħin miżjud kontra team li kien sfortunat li ħareġ b’idejh vojta mill-ground.
Issa qed jiffaċċjaw avversarju aktar diffiċli u jridu jtejbu “l-attitudni” tagħhom lejn il-logħba.
Fl-ewwel round Hibernians irreġistraw rebħa ta’ 3-1.
Iżda jridu jgħaddu mingħajr is-servizzi tas-sospiż Ferdinando Apap filwaqt li l-players ta’ Sirens huma kollha disponibbli.
Sta Lucia v Gudja U. – Sta Lucia u Gudja United jiltaqgħu f’konfront tan-naħa t’isfel tal-klassifika hekk kif, flimkien ma’ Mosta, jinsabu fiż-żona l-ħamra bi 11-il punt kull wieħed.
Din hija partita bilanċjata b’possibbiltá ta’ riżultat ta’ draw iżda xejn għajr minn rebħa ma tissodisfa l-kriterji ta-żewġ timijiet.
Il-Luċjani jistgħu jagħtu d-debutt lill-goalkeeper, Justin Haber, li ngħaqad magħhom mingħand Gzira United iżda għandhom lil Gianmarco Conti u Victor Luiz Filho sospiżi.
Min-naħa l-oħra, Gudja se jkunu mingħajr Farid Zuniga sospiż iżda jilqgħu lil Tensior Gusman mis-sospensjoni.
Birkirkara v Balzan – Birkirkara, li l-aspirazzjonijiet tagħhom għar-rebħ tat-titlu ħadu daqqa ta’ ħarta kbira, jiltaqgħu kontra l-ġirien Balzan li fl-aħħar partita tagħhom irreġistraw rebħa ta’ 2-1 kontra Valletta.
L-Istripes, li fil-bidu tal-istaġun kienu meqjusa fost l-isfidanti għar-rebħ tat-titlu, fl-aħħar sitt partiti ma kienux daqstant konsistenti hekk kif kisbu biss seba’ punti minn possibbiltá ta’ 18.
Bħalissa huma jinsabu 11-il punt taħt il-leaders Hibernians, b’logħba inqas, iżda ma għandhom l-ebda ċertezza li minnha se jieħdu t-tliet punti. Għaldaqstant din hija opportunitá biex inaqqsu d-distakk fejn jimmiraw li jirrepetu s-suċċess tal-ewwel round hekk kif ħarġu rebbieħa bl-iskor ta’ 2-1.
Iżda b’rebħa, Balzan jaqbżu lill-istess Birkirkara b’żewġ punti fir-raba’ jew fil-ħames post tal-klassifika.
U wara l-prestazzjoni brillanti tagħhom kontra Valletta żgur li se jagħmlu dak kollu possibbli biex jirbħu t-tliet punti.
Huma saħħew l-iskwadra tagħhom bil-wasliet tal-winger Olandiż Alvin Daniels u l-midfielder Serb Nilola Gulan. Iżda Sean Cipriott se jkun għax sospiż. Min-naħa l-oħra Ryan Scicluna jinsab sospiż għal Birkirkara.
PROGRAMM KOLLU
Illum
Tony Bezzina Stadium
7.00 pm: Hamrun S. v Mosta
National Stadium
7.00 pm: Valletta v Floriana
Għada
Centenary Stadium
5.00 pm: Sliema W. v Gzira U.
Tony Bezzina Stadium
7.00 pm: Hibernians v Sirens
Il-Ħamis
Centenary Stadium
5.00 pm: Sta Lucia v Gudja U.
9.00 pm: Birkirkara v Balzan