Illum, fl-Aviva Stadum f’Dublin, tintlagħab il- finali tal-UEFA Europa League bejn it-Taljani, Atalanta, u l-Ġermaniżi, Bayer Leverkusen, fejn dawn tal-aħħar jimmiraw li jkomplu bir-rekord ta’ imbattibbiltá meta s’issa ilhom 51 partita ma jiġu megħluba fil-kompetizzjonijiet kollha.
Atalanta se jikkontestaw din il-finali wara li rebħu seba’ mill-aħħar disa’ logħbiet.
Din se tkun it-tielet darba li dawn iż-żewġ timijiet se jaffrontaw lil xulxin.
Kien f’din il-kompetizzjoni meta kienu ltaqgħu, fl-istaġun 2021-22, fl-Aħħar 16. Fl-ewwel leg, Atalanta kienu rebħu bl-iskor ta’ 3-2, b’goals ta’ Ruslan Malinovskyi (23) u Luis Muriel (25, 49) filwaqt li Charles Aranguiz (11) u Moussa Diaby (63) skorjaw għal Leverkusen.
Fit-tieni leg, Atalanta kienu ħarġu rebbieħa bl-iskor ta’ 1-0 biex għaddew għall-kwarti-finali, bl-uniku goal jiġi skorjat minn Jeremie Boga (1).
Biex waslu sal-finali, Atalanta rebħu Grupp D li kien jinkludi wkoll lil Sporting Lisbon (2), Sturm Graz (3) u Rakow Czestochowa (4).
Fir-round tal-Aħħar 16 għelbu lil Sporting b’aggregate ta’ 3-2 (1-1, 2-1); lil Liverpool fil-kwarti-finali b’aggregate ta’ 3-1 (3-0, 0-1) u lil Marseille fis-semi-finali b’aggregate ta’ 4-1 (1-1, 3-0).
Il-Bergamaschi huma l-11-il team Taljan li laħaq finali kontinentali, u jistgħu isiru wkoll l-ewwel team tas-Serie A li qatt rebaħ il-UEFA Europa League.
Min-naħa l-oħra, Bayer Leverkusen jibdew bħala favoriti, friski mill-fatt li saru l-ewwel team fil-Bundesliga li rebħu l-kampjonat mingħajr telfa.
It-team immexxi mill-coach Spanjol, Xabi Alonso, għamel l-għeġubijiet ma’ dan it-team hekk kif fi 18-il xahar fir-responsabbiltá, kisser għal kollox il-monopolju ta’ Bayern Munich li rebħu l-Bundesliga għall-aħħar 11-il sena konsekuttivi.
Aktar minn hekk, l-istaġun tagħhom ma jispiċċax illum hekk kif, nhar is-Sibt li ġej, se jikkontestaw il-finali tat-Tazza Ġermaniża kontra t-team ta’ Bundesliga 2, FC Kaiserslautern.
Dan ifisser li dawn it-tmint ijiem kienu u huma ferm importanti għalihom minħabba li jistgħu jirreġistraw treble ta’ unuri.
S’issa f’dan l-istaġun, huma skorjaw xejn inqas 135 goal fil-kompetizzjonijiet kollha filwaqt li sofrew 39 goals.
Leverkusen qed ifittxu li jirbħu t-tieni trofew Ewropew wara li fl-1988 huma rebħu t-Tazza UEFA meta fil-finali għelbu lil Espanyol 3-2 bl-għoti tal-penalites wara li temmew fi draw ta’ 3-3.
Biex waslu sal-finali huma rebħu Grupp H li kien jinkludi lil Qarabag (2), Molde (3) u BK Haken (4).
Fir-round tal-Aħħar 16 għelbu lil Qarabag b’aggregate ta’ 5-4 (2-2, 3-2); lil West Ham fil-kwarti-finali b’aggregate ta’ 3-1 (2-0, 1-1) u lil Roma fis-semi-finali b’aggregate ta’ 4-2 (2-0, 2-2).
Jekk joħorġu rebbieħa, Leverkusen jistgħu jsiru r-raba’ team li jirbaħ din il-kompetizzjoni mingħajr telfa.
Atalanta għandhom lil Marten de Roon u Sead Kolasinac neqsin minħabba li qed jirkupraw minn injury filwaqt li Leverkusen mistennija jkollhom l-aqwa skwadra possibli.
