Nitsa Michael, Ingliża ta’ 84 sena li hija sid ta’ lukanda, laqgħet 22 Ukren/a fil-lukanda tagħha u tathom saqaf fuq rashom. Hija mhux qed tieħu bookings għat-turisti, lanqas fl-aktar staġuni biżlin.
Hija qalet li meta l-familja tagħha kellha taħrab minn Ċipru minħabba l-invażjoni tat-Turkija fl-1974, kienu ltaqgħu ma’ ħafna problemi u s-sitwazzjoni xejn ma kienet faċli. Għalhekk xtaqet tgħin lil dawn in-nies li qed jgħaddu mill-istess biża’ li darba għaddiet minnha hi.
Kompliet tgħid li kienet ilha tħossha mdejqa minħabba dawn in-nies li qed ikollhom jaħarbu minn pajjiżhom u kien f’dak il-mument li ġietha din l-idea biex hi wkoll tkun qiegħda tgħin.
Lil dawn it-22 Ukren/a tipprovdilhom l-ikel kif ukoll tieħu ħsieb il-bżonnijiet tagħhom. Il-fatt li tara lil dawn in-nies miġbura flimkien u kuntenti jagħmilha tassew ferħana.
Waħda mir-refuġjati, Yuliia ta’ 31 sena, li qed tgħix f’din il-lukanda flimkien mar-raġel tagħha qalet li f’din il-lukanda ma jonqosha xejn; saħansitra pprovdewlha telefown biex tkun tista’ ċċempel lill-familjari tagħha li għadhom fl-Ukrajna.
