Anzjan kellu jiddaħħal l-Isptar wara li iktar kmieni llum, għall-ħabta tal-11:40 a.m., intlaqat minn vettura fi Triq Victor Tedesco, il-Ħamrun.
Kelliem għall-Pulizija kkonfermalna din l-informazzjoni u spjegalna kif vettura Chevrolet, li kienet ipparkjata għan-niżla fit-triq, għal xi raġuni tħarrket waħidha u laqtet żewġ vetturi oħra – Toyota u Skoda li kienu pparkjati fil-madwar.
Fl-istess ħin, anzjan ta’ 81 sena residenti Santa Venera ntlaqat ukoll minn din il-vettura u kellu jittieħed l-Isptar Mater Dei għal aktar attenzjoni medika fejn aktar tard irriżulta li sofra ġrieħi gravi. Eventwalment, il-karozza spiċċat ġo ħajt.
L-investigazzjonijiet tal-Pulizija b’rabta ma’ dan il-każ għadhom għaddejjin.
Aktar dettalji fil-ħin li ġej…
