Illum jingħata bidu għat-tieni round tal-BOV Kampjonat Premier fejn l-attenzjoni tkun mixħuta fuq il-leaders Hamrun Spartans għal diversi raġunijiet, kemm fil-ground kif ukoll barra minnu.
Fi tmiem il-ġimgħa li għadda huma qabżu waħedhom fil-quċċata tal-klassiika b’rebħa ta’ 1-0 fuq Hibernians, li iżda, dawn tal-aħħar ressqu appell minħabba player ineliġibbli. L-Ispartans se jilagħbu kontra Balzan.
L-aqwa partita ta’ dan il-programm hija dik bejn Sliema Wanderers u Birkirkara filwaqt li Floriana għandhom logħba delikata kontra Sta Lucia.
Marsaxlokk jiffaċċjaw lil Naxxar Lions li huma s-sorpriża ta’ dan l-istaġun filwaqt li Hibernians jiltaqgħu ma’ Gzira United li jinsabu fin-naħa t’isfel tal-klassifika.
Imbagħad hemm żewġ konfronti meqjusa diretti bejn erba’ timijiet li qed jissieltu biex isalvaw posthom.
Iż-żewġ logħbiet huma Sirens v Valletta u Gudja United v Mosta.
Balzan v Hamrun S. – Hamrun Spartans jimmiraw li jkomplu bis-sensiela pożittiva meta jiltaqgħu kontra Balzan.
Peró, din il-partita se tintlagħab fid-dell ta’ appell li se jinstema’ nhar il-Ħamis li ġej.
L-appell tressaq minn Hibernians wara t-telfa ta’ 2-1 fejn stqarrew li l-Ispartans għamlu użu mill-player Spanjol, Christian Rutjens … daħal bħala sostitut fit-78 minuta fil-post ta’ Luke Montebello … li dan suppost irid jiskonta sospensjoni ta’ żewġ logħbiet.
Dan il-każ imur lura, f’Diċembru 2022 meta kien player ta’ Floriana u tkeċċa kontra l-istess Hibernians li dawn tal-aħħar rebħu bl-iskor ta’ 1-0.
Rutjens skonta l-ewwel partita, dik kontra Pietá Hotspurs, iżda mbagħad telaq lil Floriana u mar jilgħab fis-Serie C ma’ Foggia.
Il-Pawlisti qed isostnu li huwa ma kellu jilgħab għax dawn iż-żewġ logħbiet ma skontahomx lanqas meta kien ma’ Foggia. Nistennew u naraw.
Fl-ewwel round, Hamrun kienu għelbu lil Balzan bl-iskor ta’ 1-0.
Sliema W. v Birkirkara– Dan huwa konfornt mill-aktar interessanti għall-fatt li filwaqt li Sliema Wanderers ġejjin minn ħames rebħiet, Birkirkara kisbu ħames punti inqas minn daqstant partiti.
Il-Karkariżi ġejjin minn telfa ta’ 2-1 kontra Sta Lucia u xejn għajr minn rebħa ma tissodisfa l-kriterji tagħhom.
Min-naħa tagħhom, il- Wanderers jimmiraw li jpattu għat-telfa tal-ewwel round meta l-Karkariżi ħarġu rebbieħa 1-0.
Rebħa għall-Blues issaħħilhom it-tielet post u jistgħu jaqbżu fit-tieni post jekk Floriana jiġu megħluba.
Min-naħa tagħhom, l-Istripes se jkunu msaħħa bir- ritorn ta’ Paul Mbong minn sospensjoni.
Floriana v Sta Lucia – Floriana jridu jinsew id-diżappunt taż-żewġ telfiet preċedenti u jirriorganizzaw kontra Sta Lucia li ironikament ġejjin minn żewġ rebħiet.
Filwaqt li l-Furjaniżi qed jisfidaw għar-rebħ tat-titlu, il-Luċjani qed jissieltu għas-salvazzjoni.
Iżda wieħed jistaqsi jekk dawn iż-żewġ telfiet ta’ Floriana – kontra Hamrun Spartans u Gzira United bl-iskor identiku ta’ 1-0 – humiex skoss jew inkella bidu ta’ kollass.
Fil-veritá ma jistgħux isofru t-tielet telfa konsekuttiva minħabba li jħottu dak li bnew matul l-ewwel round, jiġġarraf kollox … u jagħtu ċ-ċans lis-Slimiżi biex jaqbżuhom.
Fl-ewwel round, Floriana ħarġu rebbieħa bl-iskor ta’ 4-0.
Hibernians v Gzira U.– Hibernians, li ġejjin minn telfa kontra Hamrun Spartans, se jiffaċċjaw lil Gzira United li minkejja li jinsabu fuq iż-żona tar-relegazzoni, bla dubju, jinżlu għal dan il-konfront b’moral għoli hekk kif ġejjin minn rebħa ta’ 1-0 fuq Floriana wara erba’ telfiet.
Rebħa tkun tfisser tama ġdida biex jilħqu l-objettivi tagħhom biex jissiġillaw posthom fl-ogħla diviżjoni.
Kull team għandu player sospiż – Alex Bruno da Souza Silva għal Hibernians u Thaylor Aldama għal Gzira.
Għall-Pawlisti jirritorna Ferdinando Apap minn sospensjoni.
Fl-ewwel round huma għelbu lill-Gżirjani 4-0.
Naxxar L. v Marsaxlokk – Teżisti possibbiltá kbira li Naxxar Lions jaqbżu waħedhom fir-raba’ post tal-klassifika jekk huma jegħlbu lil Marsaxlokk u Birkirkara jitilfu kontra Sliema Wanderers.
Bħalissa l-Lions jinsabu wara dawn iż-żewġ timijiet u bil-konsistenza li qed juru fil-logħob tagħhom ma tkun l-ebda sorpriża li jista’ jseħħ dan.
Mindu sfaw megħluba fl-ewwel round bl-iskor ta’ 5-0 minn Marsaxlokk, Naxxar huma team trasformat u jistgħu jisfidaw għal post fiż-żona Ewropea.
Iżda huma għandhom lil Pablo Carvalho sospiż.
Sirens v Valletta – Din hija partita diretta bejn żewġ timijiet li qed jiġġieldu kontra r-relegazzjoni u ħadd minnhom ma jaffordja li joħroġ b’idu vojta, l-aktar il-Pawlini li jinsabu fil-qiegħ tal-klassifika.
Huma se jkollhom lura lil Prosper Boakye Owusu minn sospensjoni.
Fl-ewwel round Valletta rebħu lil Sirens 2-0.
Gudja U. v Mosta – Ix-xenarju bejn dawn iż-żewġ timijiet huwa wieħed negattiv meta jinsabu fiż-żona l-ħamra fejn il-Mostin qed igawdu vantaġġ ta’ sitt punti fuq il-Gudjani.
Rebħa għal dawn tal-aħħar, li għandhom lil Ricardo Fernando sospiż, tiftaħ beraħ il-ġlieda għas-salvazzjoni.
Fl-ewwel round iż-żewġ timijiet spiċċaw fi draw 0-0.
